Fana: At a Speed of Life!

ለደቡብ ሱዳን ዘላቂ ሰላም የኢጋድ አባል ሀገራት ፖለቲካዊ ተሳትፎ አስፈላጊ ነው – ተመድ

አዲስ አበባ፣ ታህሳስ 5፣ 2011 (ኤፍ.ቢሲ) የደቡብ ሱዳንን የደህንነት መዋቅር ለማሻሻል የምስራቅ አፍሪካ የልማት በይነ መንግስታት (ኢጋድ) አባል ሀገራት ፖለቲካዊ ተሳትፎ አስፈላጊ መሆኑ ተገለፀ።

በደቡብ ሱዳን የሚስተዋሉ የደህንነት ችግሮችን በዘላቂነት ለመፍታት ከኢጋድ ሰላም አስከባሪ ወታደሮች በተጨማሪ፥ የኢጋድ አባል ሀገራት ፖለቲካዊ ተሳትፎ አስፈላጊ መሆኑን የተባበሩት መንግስታት ድርጅት ዋና ፀሃፊ አንቶኒዮ ጉተሬዝ ተናግረዋል።

ሀላፊው ይህን ያሉት የመንግስታቱ ድርጅት በደቡብ ሱዳን ያለውን የሰላም ሁኔታ በተመለከተ በትናንትናው ዕለት ባወጣው ሪፖርት ላይ ነው።

በሪፖርቱም በፈረንጆቹ 2018 ከመስከረም እስከ ህዳር ወር ባሉት ጊዜያት በሀገሪቱ ሰላም ማስከበር ዙሪያ በርካታ ስራዎች መከናወናቸው ተጠቅሷል።

ይሁን እንጅ የወታደሮች ቅንጅት አለመኖር የአካባቢውን ሰላም በተቀናጀ ሁኔታ ለማስከበር አስቸጋሪ አድርጎት መቆየቱም ነው የተገለፀው።

ከዚህ ባለፈም የደቡብ ሱዳንን ሰላም ዘላቂነት ለማስቀጠል በሀገሪቱ ያለውን የደህንነት መዋቅር ማሻሻል እንደሚገባ ተጠቁሟል።

እነዚህን ችግሮች ለመቅረፍም የሰላም አስከባሪዎችን ቁጥር መጨመር ብቻውን መፍትሄ ሊሆን አይችልም ተብሏል።

ስለሆነም የሚስተዋለውን ችግር በዘላቂነት ለመፍታት  የቀጠናው ሀገራት ፖለቲካዊ ተሳትፎ አስፈላጊ መሆኑ ተነስቷል።

የሀገሪቱ ተቀናቃኝ ሃይሎች በተለያዩ ጉዳዮች ላይ ያላቸውን ልዩነት በውይይት በመፍታት የሰላም ስምምነት እንዲፈፅሙ ማበረታታትም ተገቢ ነው ተብሏል።

በተጨማሪም ኢጋድና የአፍሪካ ህብረት የሀገሪቱ ተፋላሚ ሀይሎችን ለማስማማትና የቀጠናውን ችግር በቀጣይነት ለመፍታት በቅርበት ሊሰሩ እንደሚገባም ሪፖርቱ ምክረ ሃሳብ አስቀምጧል።

 

ምንጭ፦ሱዳን ትሪቢዩን

You might also like
Comments
Loading...