Fana: At a Speed of Life!

15 ሚሊየን ተማሪዎችን ተጠቃሚ የሚያደርግ የንባብ መርሃ ግብር ተጀመረ

አዲስ አበባ፣ ጥቅምት 29፣ 2011 (ኤፍ.ቢ.ሲ) በ5 ዓመት ወስጥ 15 ሚሊየን ተማሪዎችን ተጠቃሚ የሚያደርግ የንባብ ለሁሉም መርሃ ግብር የማስጀመር ስነ ስርዓት ተካሄደ።

መርሃ ግብሩ የኢፌዴሪ ትምህርት ሚኒስትር ዶክተር ጥላዬ ጌቴ እና በኢትዮጵያ የአሜሪካ አምባሳደር ማይክል ራይነርን ጨምሮ ከፍተኛ የመንግሥት የሥራ ኃላፊዎች በተገኙበት ነው በይፋ የተጀመረው።

በዛሬው እለት በሰሜን ሸዋ ዞን ባሶና ወራና ወሬዳ በይፋ የተጀመረው ፕሮጀክቱ በዩ.ኤስ.አይ.ዲ ድጋፍ በስድስት ክልሎች የሚተገበር መሆኑም ታውቋል።

የትምህርት ሚኒስትር ዶክተር ጥላዬ ጌቴ በዚሁ ወቅት እንደተናገሩት፥ በዛሬው እለት በይፋ የተጀመረው የንባብ መርሃ ግብር ትልቅ ጠቀሜታ አለው።

በተለይም ከቅርብ ጊዜያት ወዲህ ወላጆች ልጄ ማንበብ አልቻለም በማለት የሚያነሱትን ጥያቄ ከመፍታት አንፃር ጠቀሜታው ከፍተኛ መሆኑን ነው ዶክተር ጥላዬ የተናገሩት።

ስለዚህ የንባብ መርሃ ግብሩን ሁሉም በአግባቡ ሊጠቀምበት ይገባል ነው ያሉት።

በኢትዮጵያ የአሜሪካ አምባሳደር ማይክል ራይነር በበኩላቸው፥ በትምህርት ላይ የሚደረግ ኢንቨስትመንት አትራፊ መሆኑን ተናግረወዋል።

በቀጣይም የአሜሪካ መንግሰት በትምህረት ዘርፍ የሚያደርገውን ድጋፍ አጠናክሮ የሚቀጥል መሆኑን ነው አምባሳደሩ የገለጹት።

በዛሬው እለት ይፋ የተደረገው የንባብ መርሃ ግብር ከሚተገበርባቸው ክልሎች ውስጥ ትግራይ፣ አማራ፣ ኦሮሚያ፣ የደቡብ ብሄር ብሄረሰቦች እና ህዝቦች ክልል እንዲሁም አዲስ አበባ ከተማ አስተዳደር ይገኝበታል።

ለመርሃ ግብሩ ማስፈፀሚያም 86 ሚሊየን የአሜሪካ ዶላር የተመደበ ሲሆን፥ 4 ሚሊየን አጋዥ መጽሃፍትም ለትምህርት ቤቶች እንዲከፋፈል ይደረጋል ነው የተባለው።

በንባብ መርሃ ግብሩ መሰረትም በተመረጡ ክልሎች በሚገኙ በእያንዳንዱ ትምህረት ቤት 4 የንባብ ማእከላት እንዲቋቋሙ አንደሚደረግም ተጠቁሟል።

በአበበ የሸዋልኡል

You might also like
Comments
Loading...