Fana: At a Speed of Life!

124 ድርጅቶች ህገወጥ ደረሰኞችን በኮሚሽን ለነጋዴዎች እያቀረቡ ነው – የገቢዎች ሚኒስቴር

አዲስ አበባ፣ ጥቅምት 30፣ 2011 (ኤፍ.ቢ.ሲ) 124 ድርጅቶች ህገ ወጥ ደረሰኞችን በኮሚሽን ለነጋዴዎች እያቀረቡ መሆኑን የገቢዎች ሚነስቴር አስታወቀ።

በገቢዎች ሚኒስቴር የህግ ማስከበር ዘርፍ ሚኒስትር ዲኤታ አቶ ዘመዴ ተፈራ ዛሬ በሰጡት መግለጫ፥ ህጋዊ ነጋዴዎች ህገወጥ ድርጅቶች ናቸው ካላቸው 124 ድርጅቶች ጋር ምንም አይነት ግዥ እንዳይፈፅሙ አሳስበዋል።

በኮሚሽን ለነጋዴዎች ደረሰኝ በሚያቀርቡ ድርጅቶች ከነጋዴዎች ጋር በተፈጸመ ህገ ወጥ ተግባር ከ4 ቢሊየን ብር በላይ ግብይት የተፈጸመ እና ድርጊቱም አሳሳቢ ደረጃ ላይ መድረሱንም ገልጸዋል።

ያለምንም እቃ ወይንም አገልግሎት ልውውጥ ደረሰኝ ብቻ በኮሚሽን የሚያቀርቡ ድርጅቶች መኖራቸው በሚኒስቴሩ ጥናት መረጋገጡም ነው የተገለጸው።

በኮሚሽን ደረሰኝ አቅራቢዎቹ ሃሰተኛ መታወቂያ፣ የንግድ ፈቃድ እና አድራሻ ያላቸው ሲሆን፥ በገቢዎች ሚኒስቴር የመረጃ ቋት ውስጥ ያልተመዘገቡ እና ትክክለኛ የግብር ክፍያ መለያ ቁጥር የሌላቸው ናቸው ተብሏል።

በህጋዊ መንገድ ተመዝግበው የሚንቀሳቀሱ ግብር ከፋዮች ወጪያቸውን በመጨመር ገቢያቸውን በማሳነስ ግብር እንዲያጭበረብሩ የሚያግዙ መሆኑም ተጠቁሟል።

ባለፉት 4 ወራትም በ563 ድርጅቶች ላይ የተደረገ የኦዲት ስራ ከህገወጥ ደረሰኞች ጋር በተያያዘ ውድቅ መደረጉን ሚኒስትር ዲኤታው ጠቅሰዋል።

እጅ ከፍንጅ ተይዘው ምርመራ እየተደረገባቸው ያሉ ህገ ወጥ ደረሰኝ አቅራቢዎቹ መኖራቸውን የተናገሩት አቶ ዘመዴ፥ ከእነዚህ ተቋማት ጋር የሚሰሩ ህጋዊ ድርጅቶች ላይ ምርማራ ተጠናክሮ እንደሚቀጥል ነው የተናገሩት።

ከህገ ወጥ የደረሰኝ አቅራቢወች ጋር በመስራት ተመላሽ የሚጠይቁ እና ግብር ለመሰወር ሙኩራ የሚያደርጉ ነጋዴዎች ከድርጊታቸው እንዲታቀቡም አሳስበዋል።

ሚኒስቴሩ የደረሰኞችን ህጋዊነት ለማረጋገጥ የሚያስችል ቴክኖሎጂ የማሻሻል ስራ ላይ መሆኑንም ገልጸዋል።

ግብር ከፋዮች እስከ ሰኔ 30 የሰሩትን እስከ ጥቅምት 30 ማሳወቅ ያለባቸው ሲሆን፥ ባለፉት 4 ወራት 2 ሺህ 915 የግብር ከፋዮች የንግድ ስራቸውን ማሳወቃቸው ተገልጿል።

በዚህም ኪሳራ ያሳወቁ 1 ሺህ 493፣ ምንም ስራ እንዳልሰሩ መረጃ ያቀረቡት 448፣ ከክፍያ ጋር ስራቸውን ያሳወቁ 961 እና ተመላሽ የጠየቁ 13 ግብር ከፋዮች መሆናቸው ታውቋል።

በየወሩ ገቢያቸውን ማሳወቅ ካለባቸው የተጨማሪ እሴት ታክስ ግብር ከፋዮች መካከል በአማካይ 15 ሺህ 472 ያህሉ በየወሩ ስራቸውን ሲያሳውቁ መቆየታቸው ተነግሯል።

ይሁን እንጂ 64 በመቶ ያህል ተመላሽ የጠየቁ እና ሚኒስቴሩ በጉዳዩ ላይ የተለያዩ ጥናቶችን ሲያደርግ መቆየቱ ነው የተገለጸው።

በፋሲካው ታደሰ

You might also like
Comments
Loading...