Fana: At a Speed of Life!

ፍርድ ቤቱ በሰብዓዊ መብት ጥሰት በተጠረጠሩ ግለሰቦች ላይ 14 ቀን የምርመራ ጊዜ  ፈቀደ 

አዲስ አበባ፣ ህዳር 4፣ 2011 (ኤፍ.ቢ.ሲ) የሰብዓዊ መብት ጥሰት በመፈፀም የተጠረጠሩ 36  ግለሰቦች ትናትና ምሽት ፍርድ ቤት ቀረቡ።

36ቱ ተጠርጣሪዎች  የብሔራዊ  መረጃና ደህንነት፣ የፌዴራል ፖለሲ ምርመራ ቢሮ፣ ከአዲስ አበባ ፖሊስ፣ ከፌዴራል ማረሚያ ቤቶች በስራ ሃላፊነትና በሰራተኛነት ሲያገለግል የነበሩ ናቸው።

ትናንት ከ11 ሰዓት እስከ ምሽቱ 3 ሰዓት 30 በኢትዮጵያ ፍርድ ቤቶች ታሪክ ለመጀመሪያ ጊዜ ጉዳዩን የተመለከተው የፌዴራሉ ከፍተኛ ፍርድ ቤት 10ኛው የወንጀል ችሎት ፖሊስ ተጠርጣሪዎችን  በቁጥጥር ስር ያዋለበትን ምክንያት አድምጧል።

በቁጥጥር ስር ውለው ፍርድ ቤት ከቀረቡት ተጠርጣሪዎች መካከል 16 ከብሄራዊ መረጃና ደህንነት፣ ስድስቱ ከፌዴራል ፓሊስ  ምርመራ ቢሮ፣ ሁለቱ ከአዲስ አበባ ፓሊስ ኮሚሽን፣ ስምንቱ ከፌዴራል ማረሚያ ቤቶች አስተዳደር ሲሆኑ፥ ሶስቱ ግለሰቦች ደግሞ ተጠርጣሪን በማስመለጥና ሰነድ በማጥፋት የተጠረጠሩ ናቸው።

ተጠርጣሪዎቹ  ያልተሰጣቸውን ስልጣን በመጠቀም ሰዎችን የኦነግ፣የአርበኞች ግንቦት ሰባት እና የተለያዩ የሽብር ቡድኖች አባል ናችሁ በማለት ፊታቸውን በጥቁር ጨርቅ በመሸፈን በአንቡላንስ ጭነው በማይታወቅ ቦታ እስከ 1 ዓመት በማሰር የሰብዓዊ መብት ጥሰት በመፈፀም የተጠረጠሩ መሆናቸው ተገልጿል።

በተጨማሪም ከቂሊንጦ ማረሚያ ቤት ቃጠሎ ጋር በተያያዘ በማረሚያ ቤት እየታረሙ የሚገኙና ተጠርጥረው ጉዳያቸው የሚከታተሉ ሰዎችን ወደ ሸዋሮቢት እንዲሄዱ በማድረግ በማረሚያ ቤቱ ጠባቂዎች ድብደባ እንዲፈፀም አድርገዋል ሲል  ፖሊስ ለፍርድ ቤት አስረድቷል።

እንዲሁም ተጠርጣሪዎቹ ሴቶችን መድፈር፣ጥፍር መንቀል እና ሌሎች ኢሰብዓዊ ድርጊቶችን ሲፈፅሙ እንደነበረ ፓሊስ ገልጿል።

ተጠርጣሪዎቹ በተለይም ባልታወቀ ቦታ የሚያስሯቸውን ሰዎች ከአይን ማጥፋት ጀምሮ የተለያዩ የአካል ጉዳት እንዳደረሱ ፓሊስ ከተጠቂዎቹ በተቀበለው የምስክርነት ቃል ማረጋገጡን አብራርቷል።

በዚህም በርካታ ዜጎች የአካልና የስነ ልቦና ጉዳት እንደደረሰባቸው ነው ፓሊስ ለፍርድ ቤት ያስታወቀው።

ምርመራውን ለአምስት ወራት ሲያከናውን ቢቆይም ተጠርጣሪዎቹ በስራ ላይ የነበሩ በመሆኑ  በዚህ መንገድ ጥቃት የደረሰባቸው ዜጎች የምስክርነት ቃላቸውን ለመስጠት ፍርሃት እንደነበረባቸው ፖሊስ ጠቁሟል።

ፓሊስ ተፈፅሟል የተባለውን ወንጀል ውስብስብ በመሆኑና የበርካታ ምስክሮችን ቃል ለመቀበል 14 ቀን የምርመራ ጊዜ ይፈቀድልኝ ሲል ፍርድ ቤቱን ጠይቋል።

ሁሉም ተጠርጣሪዎች የሰብዓዊ መብታቸው ተጠብቆ ውጪ ሆነው እንዲከታተሉ፣ በአያያዛቸውና በሌሎቹ ጉዳዮች ለፍርድ ቤቱ ጥያቄ አቅርበዋል።

ፍርድ ቤቱም የሁሉንም ተጠርጣሪዎች የዋስትና መብት ውድቅ በማድረግ፥ 33ቱ ተጠርጣሪዎች በጉዳዩ ላይ ያላቸው ተሳትፎ በተናጠል እንዲቀርብ በማዘዝ የ14 ቀን የምርመራ ጊዜውን ፈቅዷል።

ሶስቱ ተጠርጣሪዎች መረጃ በማሸሽና ተጠርጣሪዎችን በመሰወር የተጠረጠሩ በመሆኑ ለሐሙስ ህዳር 6 ቀን 2011 ዓ.ም ተለዋጭ ቀጠሮ ሰጥቷል።

በበላይ ተስፋዬ

You might also like
Comments
Loading...