Fana: At a Speed of Life!

ፌስቡክ የመረጃ ጠላፊዎች የፌስቡክና የኢንስታርጋም ገጾችን ጠልፈው ካሳዩኝ እስከ 40 ሺህ ዶላር እሸልማለሁ አለ

አዲስ አበባ፣ ህዳር 19 2011 (ኤፍ.ቢ.ሲ) ግዙፉ የማህበራዊ ትስስር ድረ ገፅ የሆነው ፌስቡክ ለመረጃ ጠላፊዎች ዳጎስ ያለ የገንዘብ ሽልማት ማዘጋጀቱ ተሰምቷል።

ኩባንያው አሁን ያዘጋጀው ሽልማት በየዓመቱ በሚሊየን የሚቆጠሩ ማህበራዊ ትስስር ድረ ገጾች ተጠቃሚዎቹ ላይ የሚያጋጥመውን የመረጃ ምንተፋ ለማስቀረት ነው ተብሏል።

ኩባንያው እስካሁን ይህንን የመረጃ ጠላፊዎች ተግባር ለማስቆም የሚያስችሉ ጥናቶችን ለማከናወንም በየዓመቱ በሚሊየን ዶላር የሚቆጠሩ ገንዘቦችን እያወጣ መሆኑም ነው የተነገረው።

አሁን ደግሞ ፌስቡክ የማህበራዊ ትስስር ገፆቹን ለማጠናከር የመረጃ ጠላፊዎችን ተጠቅሞ የሚያካሂደውን የጥቃት ተጋላጭነት ጥናት ከፍ ያለ የገንዘብ ሽልማት ይዞ መቅረቡ ነው የተነገረው።

ፌስቡክ ኩባንያ በትናንትናው እለት እንዳስታወቀው አዲሱ ሽልማት የፌስቡክን በመጥለፍ ተጋላጭነቱን ለሚያመላክቱ የመረጃ ጠላፊዎዎች እስከ 40 ሺህ የአሜሪካ ዶላር ድረስ የሚሸልም ነው።

በሽልማት መርሃ ግብሩ መሰረትም፦ ጠላፊዎች የፌስቡክ አድራሻውን በመጥለፍ ተጠቃሚው ሙሉ በሙሉ እንዳይጠቀም ማድረግ ከቻሉ 40 ሺህ የአሜሪካ ዶላር እንደሚሸለሙ ኩባንያው አስታውቋል።

ጠላፊዎች የፌስቡክ አድራሻውን በመጥለፍ ተጠቃሚው ገፁን በአግባቡ እንዳይጠቀም ማድረግ ወይም አጠቃቀማቸውን መገደብ ከቻሉ 25 ሺህ የአሜሪካ ዶላር ይሸለማሉ ብሏል።

የመረጃ ጠላፊዎች የፌስቡክ ኩባንያ ምርት በሆኑት ፌስቡክ፣ ኢንስታግራም እና ዋትስአፕ ላይ ጠለፋውን አካሂደው ክፍተቱን በማሳየት ተሸላሚ መሆን እንደሚችሉም ነው ኩባንያው ያስታወቀው።

በዓለም ላይ ከ2 ቢሊየን በላይ ተጠቃሚዎች ያሉት ፌስቡክ ከቅርብ ጊዜ ወዲህ የተጠቃሚዎችን የግል መረጃ አሳልፉ በመስጠት እና ለመረጃ ጠላፊዎች እያጋለጠ ነው በሚል ወቀሳዎች እየቀረቡበት ይገኛሉ።

በቅርብ ጊዜ ፌስቡክ ላይ ከመረጃ ጋር ተያይዘው ከቀረቡበት ክስ ውስጥም የካንብሪጅ አናላቲካ የዳታ ቅሌት አንዱ ሲሆን፥ በዚህም የ87 ሚሊየን ደንበኞቹን የግል መረጃ አሳልፎ ሰጥቷል መባሉ አይዘነጋም።

ፌስቡክ ባሳለፍነው መስከረም ወር ባገኘው መረጃ መሰረትም በገጹ ላይ በነበረው ክፍተት አማካኝነት የ50 ሚሊየን ደንበኞቹ አድራሻ ጠላፊዎች እጅ መግባቱም ይታወሳል።

ምንጭ፦ www.techworm.net

You might also like
Comments
Loading...