Fana: At a Speed of Life!

ግማሽ ያህሉ የየመን ሕዝብ ለከፋ የረሃብ አደጋ ተጋልጧል

አዲስ አበባ፣ ጥቅምት 29፣ 2011 (ኤፍ.ቢ.ሲ) በየመን ለዓመታት በዘለቀው የእርስ በእርስ ግጭትና ጦርነት ሳቢያ ግማሽ ያህሉ የሀገሪቱ ህዝብ  ለከፋ የረሃብ አደጋ መጋለጡ ተገለፀ።

በየመን የሚገኙ 35 የሀገር ውስጥና ዓለም አቀፍ የዕርዳታ ድርጅቶች በሀገሪቱ የተከሰተውን አስከፊ የረሃብ አደጋ በተመለከተ ባዛሬው ዕለት ጋዜጣዊ መግለጫ  ሰጥተዋል

በመግለጫቸውም በሳዑዲ አረቢያ በሚመራው ጥምር ሃይል እየተፈፀመው ባለው ጥቃት ምክንያት 14 ሚሊየን ያህል የሀገሪቱ ዜጎች ለረሃብ አደጋ መጋለጣቸውን አስታውቀዋል።

ይህ ሁኔታ በዚህ የሚቀጥል ከሆነም የመን አሁን ካለችበት ቀውስ በበለጠ ፥ በአለማችን የ100 አመታት ታሪክ ውስጥ እጅግ የከፋ ይሆናል ለተባለው የረሃብ አደጋ ልትጋለጥ እንደምትችል አሳስበዋል።

ስለሆነም የዓለም አቀፉ ማህበረሰብ የችግሩን አሳሳቢነት ግምት ውስጥ በማስገባት፥ በአካባቢው የሚካሄደው ግጭት መቋጫ እንዲበጅለትና በቀጠናው የሚካሄደው የጦር መሳሪያ ዝውውርም ዕልባት እንዲያገኝ ግፊት ማድረግ አለበት ተብሏል።

በተጨማሪም በየመን ለአመታት የዘለቀው ጦርነትና የእርስ በእርስ ግጭት የሰብዓዊ እርዳታ የሚያቀርቡ አለማቀፍ ተቋማትን እንቅስቃሴ በከፍተኛ ሁኔታ በማስተጓጎል ላይ መሆኑን የተባበሩት መንግስታት ድርጅት ያመጣው ሪፖርት ያመላክታል።

በዚህ ምክንያትም በርካታ ህፃናትና ሴቶች ለከፋ የረሃብ አደጋ መጋለጣቸውን ነው 35 የሀገር ውስጥና ዓለም አቀፍ የእርዳታ ድርጅቶች ያስታወቁት።       

የሁቲ አማጽያን  መዲናዋን ሰንዓን ጨምሮ የአገሪቱን አብዛኛውን ክፍል መቆጣጠራቸውን ተከትሎ የመን በከፋ የእርስ በእርስ ግጭትና ጦርነት ውስጥ መግባቷ ይታወሳል።

ይህን ተከትሎም በሳኡዲ የሚመራው ጥምር ሃይልም አለማቀፍ እውቅና የተሰጠውን መንግስት በመደገፍ ከአማጽያኑ ጋር ከፍተኛ ጦርነት ሲያካሂድ ቆይቷል።

ምንጭ፥presstv.com

You might also like
Comments
Loading...