Fana: At a Speed of Life!

የደቡብ ሱዳን አማጽያን ለሰብዓዊ እርዳታ በራቸውን ከፍተዋል

አዲስ አበባ፣ጥቅምት 30፣2011 (ኤፍ ቢ ሲ) የደቡብ ሱዳን አማጽያን በሀገሪቱ በተከሰተው የእርስ በርስ ግጭት ጉዳት ለደረሰባቸው ዜጎች የሰብዓዊ እርዳታ አገልግሎ እንዲሰጥ መፍቀዳቸው ተገለፀ።

ባለፈው ጥቅምት ወር ላይ የደቡብ ሱዳን አማጽያን ከመንግስት ጋር የሰላም ስምምነት ለመፈጸም መስማማታቸው ይታወሳል።

ይህን ተከትሎም አማጽያኑ በሀገሪቱ ምስራቃዊ ክፍል ኢትዮጵያ ድንበር አካባቢ የሚገኙ ዜጎች የሰብዓዊ ዕርዳታ ያገኙ ዘንድ ፍቃድ መስጠታቸው ነው የተነገረው ።

ይህ ድርጊትም የእርስ በርስ ግጭቱ ከተጀመረ በፈረንጆች 2016 ወዲህ አማጽያን ቡድኑ የወሰደው የመጀመሪያው እርምጃ መሆኑ ተገልጿል።

አማጽያኑ እስካሁን ለሰብዓዊ እርዳታ ፍቃደኛ ባለመሆናቸው ምክንያት በርካታ የሀገሪቱ ዜጎች ለከፋ ረሃብና ስደት መዳረጋቸውን የተባበሩት መንግስታት ድርጅት ያወጣው ሪፖርት ያመላክታል።

በሪፖርቱም አማጽያኑ የሰብዓዊ እርዳታ ሰጪ ድርጅቶች ምንም ዓይነት አገልግሎት ለተጎጅዎች እንዳይደርስ መንገድ ከመዝጋት ባለፈ በእርዳታ ሰጭ ሰራተኞች ላይ ጥቃት ያደርሱ ነበር ተብሏል።

ይሁን እንጂ በአሁኑ ወቅት ከመንግስት ጋር የተደረገውን ስምምነት ምክንያት በማድረግ የተለያዩ የሰብዓዊ እርዳታ መስጫ መንገዶች የሚከፈቱ መሆኑን የአማጽያን ቡድኑ ቃል አቀባይ ፓውል ጋብሬል ተናግረዋል።

ባለፉት አምስት ዓመታት ውስጥ በደቡብ ሱዳን በተካሄደ የእርስ በርስ ግጭት ምክንያት በአስር ሺህዎች የሚቆጠሩ ዜጎች እስከወዲያኛው ሲያሸልቡ በርካቶች ደግሞ ከቤት ንብረታቸው ተፈናቅለዋል።

ምንጭ ፦ሲጂቲኤን

You might also like
Comments
Loading...