Fana: At a Speed of Life!

የኮንቴነር ክምችት በደረቅ ወደብ ላይ እያስከተለ ያለውን ችግር ለመቅረፍ ሁሉም በጋራ መስራት እንዳለበት ተገለፀ

አዲስ አበባ፣ ጥቅምት 27፣ 2011 (ኤፍ.ቢ.ሲ) የኮንቴነር ክምችት በደረቅ ወደብ ላይ እያስከተለ ያለውን ችግር ለመቅረፍ ሁሉም በጋራ መስራት እንዳለበት የገቢዎች ሚኒስትር ወይዘሮ አዳነች አቤቤ ተናገሩ።

የገቢዎች ሚኒስትር ወይዘሮ አዳነች አቤቤ ከትራንስፓርት ሚኒስትር ወይዘሮሮ ዳግማዊት ሞገስና የሚመለከታቸው የስራ ኃላፊዎች ጋር የሞጆ ደረቅ ወደብ የኮንቴነር ክምችትና ከደረቅ ወደቡ ስራ ጋር ግንኙነት ያላቸውን መስሪያ ቤቶች የቅንጅት አገልግሎት አሰጣጥ ጥቅምት ጎብኝተዋል።

ከጉብኝቱ በኋላ በተደረገው ውይይት የገቢዎች ሚኒስትር ወይዘሮ አዳነች አቤቤ ደረቅ ወደቡን ከመጎብኘት ባለፈ ሁሉም ባለድርሻ አካላት የየራሱን ድርሻ በመወጣት በጊዜ የለንም መንፈስ ወደ ተግባር የሚያስገባ ስራ ይሰራል ብለዋል።

ችግሮችን በጋራ በመለየት ሁሉም የየራሱን ድረሻ ከተወጣ የንግድ ሥርዓቱን ቀልጣፋ ከማድረግ በተጨማሪ የመንግሥትን ገቢ በአግባቡ መሰብሰብ ይቻላል ያሉት ሚኒስትሯ፥ ለዚህ ደግሞ ፈጣን ውሳኔ መስጠት ይገባል ሲሉም ተናግረዋል።

ውሳኔ አሰጣጡም ህጉን የተከተለ በማድረግ የኮንቴነር ክምችት እያስከተለ ያለውን ችግር በየደረጃው ለመቅረፍ ሁሉም በደረቅ ወደቡ የተለያዩ አገልግሎት እየሰጡ የሚገኙ ተቋማት በጋራ መሥራት እንዳለባቸውም ገልፀዋል።

በተለይ ለህዝቡ ሲባል ቀረጥ ሳይከፈልባቸው መንግሥት ለልማቱ የሚያውለውን ገንዘብ ለዜጎች ቅድሚያ ሰጥቶ በድጎማ ያስገባውን ዘይትና ሌሎች ዕቃዎች ለተጠቃሚው ሳይደርስ በደረቅ ወደቡ ለረጅም ጊዜያት መቆየታቸው አግባብ የሌለው ስለሆነ ከሚመለከታቸው ተቋማት ጋር በመነጋገር ፈጣን ውሳኔ እንደሚሰጥበትም አስታውቀዋል።

ሌሎች የደረቅ ወደብ የመቆያ ጊዜያቸው ያለፈባቸው የኮንቴነር ክምችቶችን ግን በደረቅ ወደቡ አገልግሎት አሰጣጥ እና በመንግሥት ገቢ አሰባሰብ ላይ ከፍተኛ ጫና እያሳደሩ በመሆኑ የመውረሱ ሂደት እንደሚቀጥል ሚኒስትሯ አሳውቀዋል።

የትራንስፖርት ሚኒስትር ወይዘሮ ዳግማዊት ሞገስ በበኩላቸው፥ አሁን ባለንበት ሁኔታ እየታዩ ያሉ ችግሮችን ለመቅረፍ የእያንዳንዳችን ድርሻ በመወጣት በጋራ እጅ ለእጅ ተያይዘን እንሠራለን ብለዋል።

ከዚህን በተጨማሪ በቀጣይም በሚኒስትሮች ምክር ቤት የጸደቀውን የሎጅስትኪስ ስትራቴጂ መነሻ በማድረግ የሎጅስቲክስ ካውንስል በማቋቋም በ100 ቀናት ውስጥ የሚኒስትር መስሪያ ቤቱ እቅድ መሰረት በማድረግ ወደ ተግባር እንዲገባም ገልጸዋል።

በዚህም ቅንጅት በመፍጠር በጠቅላይ ሚኒስቴር ጽህፈት ቤት በኩል ለህዝብ ይፋ የተደረገውን የደረቅ ወደብ ቆይታ ግዜን አሁን ካለበት በአማካኝ 47 ቀን በ2012 ዓ.ም በአማካኝ ወደ 2 ቀን ለመቀነስ እንደሚሰራም አስታውቀዋል።

You might also like
Comments
Loading...