Fana: At a Speed of Life!

የደረሱ ሰብሎችን በአፋጣኝ በመሰብሰብ ሊያጋጥም ከሚችል ብክነት መከላከል እንደሚገባ ተገለፀ

አዲስ አበባ፣ ጥቅምት 29፣ 2011 (ኤፍ.ቢ.ሲ) የደረሱ ሰብሎችን በአፋጣኝ በመሰብሰብ ሊያጋጥም ከሚችል ብክነት መከላከል እንደሚገባ የግብርና ሚኒስቴር አሳሰበ።

በ2010/11 መኸር ዓመት 374 ነጥብ 7 ሚሊየን ኩንታል ምርት ይሰበሰባል ተብሎ የታቀደ ሲሆን፥እስካሁን የተሰበሰበው ግን 7 ነጥብ በመቶ ብቻ መሆኑን የግብርና ሚኒስትር ዴታው አቶ ሳኒ ረዲ ዛሬ ከብሄራዊ ሜትሪዎሎጂ ኤጀንሲ ዋና ዳይሬክተር አቶ ፈጠነ ተሾመ ጋር በጋራ በሰጡት መግለጫ ጠቁመዋል።

በመግለጫውም በአሁኑ ወቅት በአንዳንድ አካባቢዎች እየጣለ ያለው ወቅቱን ያልጠበቀ ዝናብ በቀጣዮቹ ቀናትም ሊቀጥል የሚችል መሆኑን ተገልጿል።

በኦሮሚያ ክልል ምእራብና ምስራቅ ወለጋ፣ ምእራብና ደቡብ ሸዋ፣ሰሜን ሸዋ፣ጅማ ኢሉ አባቦራ፣ምስራቅና ምእራብ ሃረርጌ ወቅቱን ያልጠበቀ ዝናብ ከሚጠበቅባቸው አካባቢዎች መካከል ናቸው።

በአማራ ክልል የመኸር ሰብል አብቃይ አካባቢዎች፣በቤኒሻንጉል ጉምዝ የአሶሳና የከማሺ ዞኖች፣ የወላይታ ፣የዳውሮ፣ የከፋ፣ የቤንች ማጂና ሸካ ዞኖችም ወቅቱን ያልጠበቀና በአብዛኛው ከመደበኛው ጋር የተቀራረበ ዝናብ እንደሚኖራቸው የወሩ ትንበያ ማሳየቱን ዋና ዳይሬክተሩ አቶ ተሾመ ገልጸዋል።

ስለሆነም ምርት ባልተሰበሰበባቸው አካባቢዎች በርብርብና የግብርና መሳሪያዎችን በመጠቀም በአፋጣኝ የደረሱ ሰብሎች እንዲሰበሰቡ አሳስበዋል።

የተሰበሰቡ ሰብሎችም ዝናብና እርጥበት በማያስገባ መልኩ እንዲከመሩ በማድረግ የምርት ብክነትን መከላከል ይገባል ነው ያሉት።

የግብርና ሚኒስትር ዴታው አቶ ሳኒ ረዲ በበኩላቸው፥ አርሶ አደሩ የደረሱ ሰብሎችን ከማሳ ላይ በማንሳትና ወደ ጎተራ በማስገባት ርብርብ ሊያደርግ ይገባል ብለዋል።

ለእርዳታውም ለከፍተኛ ትምህርት ተቋማት፣ለመከላከያ ሰራዊትና ለተለያዩ ተቋማትም ጥሪ መቅረቡን ነው ሚኒስትር ዴታው የገለጹት።

አርሶ አደሩ ለሰብል አጨዳና ውቂያ የሚያገለግሉ ዘመናዊ መሳሪያዎችን እንዲያገኝ ከአቅራቢዎች ጋር ውይይት ተደርጎ ስምምነት ላይ ተደርሷል።

ወቅቱን ያልጠበቀው ይህ ዝናብም ለሰብል ተባዮች መራቢያ አመቺ ሁኔታን ሊፈጥር ስለሚችል አርሶ አደሩ ወቅቱን የጠበቀ አሰሳ ማድረግ እንደሚኖርበትም የስራ ሃላፊዎቹ ገልጸዋል።

 

 

በትእግሰት ስለሺ

 

 

You might also like
Comments
Loading...