Fana: At a Speed of Life!

የዓለም ሀገራት የወሊድ ምጣኔ መቀነሱ ተነገረ

አዲስ አበባ፣ ጥቅምት 29፣2011 (ኤፍ.ቢ.ሲ) ላንሴት በተሰኘው የምርምር መጽሔት ላይ የታተመ አንድ ጥናት የዓለም የወሊድ ምጣኔ እየቀነሰ መሄዱን ይፋ አድረገ፡፡

መጽሔቱ እንዳተተው ከሆነ በተለይም ግማሾቹ የዓለም ሀገራት የችግሩ ተጋላጭ መሆናቸውን አትቷል፡፡

አዲስ ይፋ የተደረገው ጥናት ከአውሮፓውያኑ 1950 እስከ 2017 ያለውን ጊዜ መዳሰሱ ተጠቅሷል፡፡

በዚህም በ1950ዎቹ የነበረው የወሊድ ምጣኔ በአማካይ አንድ እናት 4 ነጥብ 7 ህጻናት ትወልድ እንደነበረ ጠቅሶ፥ ይህ ቁጥር ባለፈው ዓመት ወደ 2 ነጥብ 4 መውረዱን አሳይቷል፡፡

ሆኖም ይህ አማካይ አሃዝ እንደየዓለም ሀገራት ተጨባጭ ሁኔታ የሚለያይ ሲሆን፥ እንደምሳሌ ከተነሱት ሀገራት መካከልም በምዕራብ አፍሪካዊቷ ኒጀር አንድ እናት በአማካ 7 ነጥብ 1 ህጻናትን ስትወልድ በቆጵሮስ ደግሞ አንድ እናት በአማካይ አንድ ልጅ ብቻ እንደምትወለድ ጥናቱ አትቷል፡፡

የአንድ ሀገር የወሊድ ምጣኔ ከ2 ነጥብ 1 በታች በሚሆንበት ወቅት የህዝብ ቁጥሩ ወደታች እያሽቆለቆለ እንደሚሄድ መረጃዎች ያመለክታሉ፡፡

በርግጥ በ1950ዎቹ አንድም የዓለም ሀገር በዚህ አማካይ ቁጥር ውስጥ ያለመግባቱ የሚታወስ ሲሆን፥ በአሁኑ ወቅት ግን ግማሾቹ ሀገራት በዚህ መስመር ውስጥ መግባታቸው በጥናቱ ተረጋግጧል፡፡

በተለይም በኢኮኖሚ የዳበሩ የዓለም ሀገራት ዋነኞቹ ሰለባዎች ናቸው ተብሏል፤ ከነዚህም መካከል የአውሮፓ ሀገራት፣ አሜሪካ፣ አውስትራሊያ እና ደቡብ ኮሪያ ዋነኞቹ ናቸው ተብሏል፡፡

በዘርፉ አንቱታን ያተረፉ ባለሙያዎች የወሊድ ምጣኔው ለምን በዚህ መልኩ ሊቀንስ እንደቻለ ሦስት ነጥቦችን አስቀምጠዋል፡፡

ከነዚህም መካከል አነስተኛ የልጆች የሞት ምጣኔ አንዱ ሲሆን፥ ይህም ቤተሰቦች በቁጥር አነስተኛ የሆነ ልጆች እንዲኖሩዋቸው የራሱን አስተዋጽዖ ያደርጋል ተብሏል፡፡

ሁለተኛ ደግሞ የወሊድ መከላከያዎች እንደልብ መስፋፋት ሲሆን፥ ሦስተኛው ምክንያት ሴቶች ከየትኛውም ጊዜ በላቀ በትምህርትና በስራ ገበታ ላይ በመሰማራታቸው መሆኑ ተገልጿል፡፡

 

 

 

 

 

 

 

 

 

 

 

 

ምንጭ፦ቢቢሲ

በአብርሃም ፈቀደ

You might also like
Comments
Loading...