Fana: At a Speed of Life!

የኦሮሚያ ክልል ርእስ መስተዳድር አቶ ለማ መገሳ የሰላም አምባሳደር እናቶችን ተቀብለው አነጋገሩ

አዲስ አበባ፣ ህዳር 21፣ 2011 (ኤፍ.ቢ.ሲ) ከዘጠኙ ክልሎችና ሁለት የከተማ አስተዳደሮች የተውጣጡ የሰላም አምባሳደር እናቶች ዛሬ የኦሮሚያ ክልል ጉብኝታቸውን ጀመሩ።

የሰላም አምባሳደር እናቶች ቡድን ከዚህ በፊት በደረሱባቸዉ የአማራ፣ ትግራይ እና አፋር ክልሎችም ከተለያዩ አካላት በሰላም ጉዳዮች ዙሪያ ሲመክሩ መቆየታቸው ይታወሳል።

በዛሬው እለትም የኦሮሚያ ክልል ርእሰ መስተዳድር አቶ ለማ መገርሳ የሰላም ጥሪያቸውን ተቀብለዋል።

በዚህም ወቅት የሰላም አምባሳደሮቹ መንግስት በሀገሪቱ ለተፈጠረው የሰላም መደፍረስ እልባት ለማበጀት ከምን ጊዜም በተሻለ መልኩ እንዲንቀሳቀስ ጥሪያቸዉን አስተላልፈዋል።

ኢትዮጵያ የበርካታ ብሄር ብሄረሰቦችና ህዝቦች ሀገር መሆኗን በመግለፅም፥ ባህላዊ የግጭት መፍቻ ዘዴዎቻችን መተግበር እንዳለባቸው በመጠቆም፥ የሀገር ሽማግሌዎች የጎላ ድርሻ እንዲወጡ ጠይቀዋል።

የኦሮሚያ ክልል ርዕሰ መስተዳድር አቶ ለማ መግርሳ በበኩላቸው ሀገሪቱ ወደ ፊት ለመቀጠል ከሰላም የበለጠ የሚያስፈልጋት ነገር እንደሌለ ነው የገለጹት።

የሰላም ተጓዦቹን ሀሳብ ያደነቁት አቶ ለማ መገርሳ እንደ ኦሮሚያ ክልል ሰላምን ለማረጋገጥ እንደሚሰሩ ለሰላም አምባሳደሮቹ ቃል ገብተዋል።

ለሀገሪቱ ብሄር ብሄረሰቦች አንድነት እና መቀራረብ የማይበጁ ነገሮችን እንደሚያወግዙም ነው በዚሁ ውይይታቸው የተናገሩት።

ሰላማችንን መጠበቅ ካልቻልን እንደ ቤተሰብም ሆነ እንደ ሀገር ለመቀጠል እንቸገራለን ያሉት ርዕሰ መስተዳደሩ፥ የሰላም ጉዳዩ ለተወሰነ አካል የሚተዉ አለመሆኑንና ሁሉም ሊረባረብ እንደሚገባም ነው መልዕክታቸውን ያስተላለፉት።

በአፈወርቅ አለሙ

You might also like
Comments
Loading...