Fana: At a Speed of Life!

በዋና መስሪያ ቤቶችና በኢምባሲዎች  የተጀመረው የሰው ሀይል ምደባ በሚቀጥለው ሳምንት እንደሚጠናቀቅ ተገለፀ

አዲስ አበባ፣ ጥቅምት 29፣ 2011 (ኤፍ.ቢ.ሲ) በዋና መስሪያ ቤትና በኢምባሲዎች የተጀመረው የሰው ሀይል ምደባ  በሚቀጥለው ሳምንት እንደሚጠናቀቅ የውጭ ጉዳይ ሚኒስቴር አስታወቀ።

አዲሱን መዋቅራዊ አደረጃጀት ተከትሎ የሰው ሀይል ምደባ ከያዝነው ሳምንት ጀምሮ እየተከናወነ ይገኛል።

በትናትናው ዕለትም የ31 ከፍተኛ አመራሮች ምደባ  እንደተካሄደ የተገለፀ ሲሆን፥ ከእነዚህም ውስጥ አንድ ሶስተኛ የሚሆኑት ወጣቶች እንደሆኑ ተገልጿል።

መዋቅራዊ ለውጡ አምስት ቋሚ ተጠሪ አደረጃጀቶች  ያካተተ ሲሆን፥እስከ 25 ዓመት ልምድ ያላቸው  አምባሳደሮች እንደተመደቡ ተነግሯል።

የእነዚህ ዋና ሀላፊነትም የመስሪያ ቤቱን  የዕለት ከዕለት ስራ ማቀላጠፍ  እንደሆነና የሚኒስትሩና ሚኒስተር ደኤታዎች ዋና ትኩረት ፓሊስና ስትራቴጂ ላይ እንዲሆን ያስችላል ተብሏል።

በኢትዮዽያ እየተካሄደ ያለውን ዘርፈ ብዙ ለውጥ ተከትሎ ጠቅላይ ሚኒስትር ዶክተር አብይ አህመድ የውጭ ጉዳይ ሚኒስቴር መዋቅራዊ ለውጥ እንዲያካሂድ ባስቀመጡት አቅጣጫ መልክ እየተከናወነ  መሆኑን የውጭ ጉዳይ ሚኒስትር ቃል አቀባይ አቶ መለስ አለም ተናግረዋል።

ቃል አቀባይ መለስ አለም ውጭ ጉዳይ ሚኒስቴር መዋቅራዊ ለውጥ ያካሄደው የኢትዮዽያን ብሄራዊ ጥቅም ለማስጠበቅ፣ ሚናውን ለማጠናከር እና ለ21ኛው ክፍለ ዘመን የሚመጥን የዲፕሎማሲ ስራ የመስራት ግቡን እውን ለማድረግ ነው ብለዋል።

የውጭ ጉዳይ ሚኒስቴርን የማሻሻል ተግባር ውስጥ ትኩረት የተሰጣቸው በሶስት ጉዳዮች ላይ ነው ።

እነዚህም የአደረጃጀት እና መዋቅር ለውጥ ፣የሰው ሃይል ምደባ እና ስምሪት ፣የመሰረተ ልማት እና የአቅም ግንባታ ስራዎች  እንደሆኑ ተገልጿል።

ቃል አቀባይ መለስ አዲሱ መዋቅር ስራ ወደ ተግባር በመግባቱ አምስት ቋሚ ተጠሪዎች መሾማቸውን ተናግረዋል።

የሰው ሀይል ምደባው  የተለያዩ  መስፈርቶችን  መሰረት ያደረገ እንደሆነ  ተጠቁሟል።

በዚህም የሙያን መስፈርት  ፣ተቋሙ እያካሄደ ያለውን የፓሊሲ ማሻሻያ ተግባራዊ ማድረግ የሚችሉና የኢትዮጵያን ዲፕሎማሲ ከ21ኛው ክፍለ ዘመን የሚመጥን  የማድረግ አቅም ያላቸው  ናቸው ተብሏል።

ከዚህ ጎን ለጎንም የአምባሳደሮች ጥሪና ሹመት እንደሚካሄድ የውጭ ጉዳይ ሚኒስትር ቃል አቀባይ አቶ መለስ አለም አስታውቀዋል።

በስላባት ማናየ

You might also like
Comments
Loading...