Fana: At a Speed of Life!

ወ/ሮ መአዛ አሸናፊ የፌዴራል ጠቅላይ ፍርድ ቤት ፕሬዚዳንት ሆነው ተሾሙ

አዲስ አበባ፣ ጥቅምት 22፣ 2011 (ኤፍ.ቢ.ሲ) ወይዘሮ መአዛ አሸናፊ የፌደራል ጠቅላይ ፍርድ ቤት ፕሬዚዳንት ሆነው ተሾሙ።

የህዝብ ተወካዮች ምክር ቤት በዛሬው እለት ባካሄደው ስብሰባው ጠቅላይ ሚኒስትር ዶክተር አብይ አህመድ በእጩነት ያቀረቧቸውን ወይዘሮ መአዛ አሸናፊ የፌደራል ጠቅላይ ፍርድ ቤት ፕሬዚዳንት አድርጎ ሾሟል።

ምክር ቤቱም ለፌደራል ጠቅላይ ፍርድ ቤት ፕሬዚዳንትነት በእጩነት የቀረቡትን ወይዘሮ መአዛ አሸናፊን ሹመት በሙሉ ድምጽ ነው ያፀደቀው።

ወይዘሮ መአዛ አሸናፊም በህዝብ ተወካዮች ምክር ቤት ቀርበው ቃለ መሃላ ፈፅመዋል።

ጠቅላይ ሚኒስትር ዶክተር አብይ አህመድ አቶ ሰለሞን አረዳን ለፌደራል ጠቅላይ ፍርድ ቤት ምክትል ፕሬዚዳንት እጩነት አቅርበውም አስፀደቀዋል።

ምክር ቤቱም አቶ ሰለሞን አረዳ የፌደራል ጠቅላይ ፍርድ ቤት ምክትል ፕሬዚዳንት ሆነው እንዲሾሙ በሙሉ ድምጽ አጽድቋል።

አቶ ሰለሞን አረዳም በምክር ቤቱ ፊት ቀርበው ቃለ መሃላ ፈፅመዋል።

የፌደራል ጠቅላይ ፍርድ ቤት ፕሬዚዳንት ሆነው የተሾሙት ወይዘሮ መአዛ አሸናፊ በቤኒሻንጉል ጉሙዝ አሶሳ ከተማ የተወለዱት ሲሆን፥ ስመጥር የሴቶች መብት ተሟጋች በመሆን ነው የሚታወቁት።

ወይዘሮ መአዛ የመጀመሪያ ዲግሪያቸውን ከአዲስ አበባ ዩኒቨርስቲ ያገኙ ሲሆን፥ ሁለተኛ ዲግሪያቸውን ደግሞ ከአሜሪካው ኬንት ዩኒቨሪስቲ በአለም አቀፍ ግንኙነት ነው ያገኙት።

ወይዘሮ መዓዛ አሸናፊ የከፍተኛ ፍርድ ቤት ዳኛ ሆነው በመሆን ያገለገሉ ሲሆን፥ የኢትዮጵያ ህገ መንግስት ኮሚሽን የህግ አማካሪ ሆነውም አገልግለዋል።

የኢትዮጵያ የህግ ባለሙያ ሴቶች ማህበር መስራች እንዲሁም የመጀመሪያው የሴቶች ባንክ እናት ባንክ መስራች አባል እና የባንኩ የቦርድ ሰብሳቢ ሆነው አገልግለዋል።

በዛሬው ዕለት የተሰጣቸው የፌደራል ጠቅላይ ፍርድ ቤት ፕሬዝዳንትነት ሹመት በፍርድ ቤቱ ታሪክ የመጀመሪያዋ ሴት ፕሬዝዳንት ያደርጋቸዋል።

የፌደራል ጠቅላይ ፍርድ ቤት ምክትል ፕሬዚዳንት ሆነው የተሾሙት አቶ ሰለሞን አረዳም ገርበ ጉራቻ ኩዩ ነው የተወለዱት።

አቶ ሰሎሞን አረዳ የመጀመሪያ ዲግሪያቸውን ከአዲስ አበባ ዩኒቨርሲቲ በሕግ ያገኙ ሲሆን፥ ሁለተኛ ዲግሪያቸውን ከሀርቫርድ ዩኒቨርሲቲ ዓለም አቀፍ የኢኮኖሚ፣ ከሀርቫርድ ዩኒቨርሲቲ ህግ ኤምቢኤ፤ አሁንም ከሀርቫርድ ዩኒቨርሲቲ በህግ ማስተርስ በከፍተኛ ውጤት የተመረቁ።

የስራ ለምዳቸውም በወረዳ ፍርድ ቤት በዳኝነትና በፕሬዝዳንትነት ያገለገሉ፤ በፌዴራል ከፍተኛ ፍርድ ቤት ለረዥም ጊዜ በዳኝነት ያገለገሉ ናቸው።

ዘሄግ በሚገኘው ዓለም አቀፍ የግልግል ዳኝነት በገላጋይ ዳኝነት በማገልገል ላይ የሚገኙ ሲሆን፥ በመላው አፍሪካ በህግ የማማከር አገልግሎት እየሰጡ ይገኛሉ።

በሙለታ መንገሻ

You might also like
Comments
Loading...