Fana: At a Speed of Life!

አየር መንገዱ ከ41 ዓመታት በኋላ ወደ ሞቃዲሾ በረራ ጀመረ

አዲስ አበባ፣ ጥቅምት 30፣ 2011 (ኤፍ.ቢ.ሲ) የኢትዮጵያ የአየር መንገድ ከ41 ዓመታት በኋላ ወደ ሞቃዲሾ በረራ ጀምሯል።

የአየር መንገዱ ዋና ስራ አስፈጻሚ አቶ ተወልደ ገብረማርያም አየር መንገዱ በዛሬው እለት ወደ ሞቃዲሾ በይፋ በረራ መጀመሩን አብስረዋል።

ዋና ስራ አስፈፃሚው እንደገለጹት የበረራው መጀመር የሁለቱን ሀገራት የህዝብ ለህዝብ እና የንግድ ግንኙነት ያጠናክረዋል።

በመላው ዓለም የሚገኘውን የሶማሊያ ዳያስፖራ ወደ ሃገሩ እንዲገባ በማድረግ ሶማሊያን እንደገና ለመገንባት በሚደረገው ሂደት ትልቅ ሚና እንደሚኖረውም ነው የተናገሩት።

ከዚህ ባለፈም የሶማሊያን የአሳና ሌሎች የወጪ ምርቶችን ወደ ተለያዩ ሃገራት እንድትልክ የካርጎ አገልግሎት መስጠት እንደሚያስችልም ገልጸዋል።

የአየር መንገዱ የካርጎ አገልግሎት በሚቀጥሉት ሁለት ሳምንታት እንደሚጀም ነው የተገለጸው።

በተለይ የኢትዮጵያ መጠኑ ከፍ ያለ የዓሳ ምርት ከሶማሊያ የምታስገባ እንደመሆኗ የካርጎ አገልግሎት መጀመሩ የንግድ ግንኙነቱን ያሳድገዋል ተብሏል።

ቻይናን የመሰሉ ግዙፍ የሶማሊያ ዓሳ ምርት ሸማቾች የዚህ ካርጎ አገልግሎት ተጠቃሚ ይሆናሉ ተብሎ ይጠበቃል።

አቶ ተወልደ አያይዘውም ሶማሊያ የኢትዮጵያ የንግድ አጋር መሆኗን ጠቅሰው፥ የበረራው መጀመር አሁን ላይ በቀጠናው እየተፈጠረ ያለውን ሰላም እና አንድነት እንደሚያጠናክረውም ጠቅሰዋል።

ዓየር መንገዱ ከበርካታ አስርት ዓመታት በኋላ በይፋ በረራውን ጀምሮ አውሮፕላኑ ሞቃድሾ ሲደርስ የሶማሊያ ከፍተኛ ባለስልጣናት ደማቅ አቀባበል አደርገዋል።

 

በባሃሩ ይድነቃቸው

You might also like
Comments
Loading...