Fana: At a Speed of Life!

አየር መንገዱ በአፍሪካውያን ዘንድ ያለውን ስም እና ዝና አስጠብቆ ለመጓዝ እየሰራ መሆኑን አስታወቀ

አዲስ አዲስ አባበ፣ ጥቅምት 26፣ 2011 (ኤፍ.ቢ.ሲ) የኢትዮጵያ አየር መንገድ በአፍሪካያውያን ዘንድ ያለውን ስም እና ዝና አስጠብቆ ለመጓዝ ከዘመኑ ቴክኖሎጂ ጋር ራሱን አዋህዶ እንደሚጓዝ የአየር መንገዱ ዋና ስራ አስፈፃሚ አቶ ተወልደ ገብረማርያም ገለጹ።

የአፍሪካ አየር ክልልን ለአፍሪካውያን አየር መንገዶች ክፍት ማድረግ የሚለው ስምምነት የኢትዮጵያ አየር መንገድ በአህጉሪቷ ያለውን ተደራሽነት ለማስፋት እድል እንደፈጠረለትም ተናግረዋል።

በዚህም የኢትዮጵያ አየር መንገድ በአፍሪካ 59 መዳረሻዎች ያሉት መሆኑን እና በጥቂት ጊዜ ውስጥ ከተለያዩ ሀገራት ጋር በመሆን አምስት አየር መንገዶችን በማቋቋም ላይ መሆኑን፥ ዋና ስራ አስፈፃሚው ከፋና ብሮድካስቲንግ ኮርፖሬት ጋር ባደረጉት ቆይታ አስረድተዋል።

ባለፈው አመት ጥር ወር ላይ በተካሄደው የአፍሪካ ህብረት የመሪዎች ጉባኤ የህብረቱ ኮሚሽን ሊቀመንበር ሙሳ ፋቂ መሃማት፥ በስብሰባው ከሚፈረሙት እና ይፋ ከሚሆኑት ዋና ዋና የህብረቱ የትኩረት አቅጣጫዎች መካከል አንዱ የአፍሪካን አየር ክልል ለአፍሪካውያን አየር መንገዶች ነፃ የማድረግ ስምምነት መሆኑን ይፋ አድርገው ነበር።

የኮሚሽኑ ሊቀ መንበነር እንዳሉትም ስምምነቱ በወቅቱ የአፍሪካ ህብረት ሊቀመንበር የሩዋንዳው ፕሬዚዳንት ፖል ካጋሚ ይፋ ተደርጓል።

ስምምነቱ ይፋ ሲደረግ በስፍራው የነበሩት የውጭ ጉዳይ ሚኒስቴር ቃል አቀባይ አቶ መለስ አለም ፋይዳው ለኢትዮጵያ አየር መንገድ ብዙ መሆኑን ለጣቢያችን ተናግረው ነበር።

የአየር መንገዱ ዋና ስራ አስፈጻሚ አቶ ተወልደ ገብረማርያም አሁን ላይ ስምምነቱ በሁሉም የአፍሪካ ሀገራት ዘንድ እየተተገበረ ሲሆን፥ አፍሪካውያን ለዚህ ስምምነት ሁለት አይነት ምላሽ እየሰጡ ነው ብለዋል።

የተወሰኑት ወደ ተግባር ሲገቡ ሌሎቹ ደግሞ ስምምነቱን ከሀገራቸው ህግጋት ጋር የማጣጣም ስራ ላይ ናቸው ያሉት ዋና ስራ አስፈፃሚው፥ የአፍሪካን አየር ክልል ለአፍሪካውያን አየር መንገዶች ክፍት ማድረግ የሚለው ስምምነት ያመጣቸው ስኬቶች መኖራቸውን ጠቁመዋል።

አየር መንገዱ በአፍሪካውያን መካከል ያለውን ዝቅተኛ የሆነውን የእርስ በእርስ የንግድ ግንኙነት ከፍ ለማድረግ በሚካሄደው እንቅስቃሴ ላይ የራሱን ድርሻ ለመወጣት እየጣረ መሆኑንም ገልጸዋል።

ኢትዮጵያ ካለፈው ጥቅምት ቀን 21 ጀምራ ለአፍሪካ ህብረት አባል ሀገራት ዜጎች የመዳረሻ ቪዛ መስጠት ጀምራለች።

ዋና ስራ አስፈፃሚው አየር መንገዱ ከኤምባሲዎች ጋር በጋራ በመስራት አዲስ አበባን የአፍሪካ ቪዛ መዳረሻ ለማድረግ እቅድ ነድፎ እየሰራ መሆኑንም ነው የተናገሩት።

በስላባት ማናዬ

You might also like
Comments
Loading...