Fana: At a Speed of Life!

አርቢትር ጌቱ ተፈራ ላይ የ18 ወራት እገዳ ተላለፈባቸው

አዲስ አበባ ፣ህዳር 19፣2011(ኤፍ.ቢ.ሲ)የኢትዮጵያ እግር ኳስ ፌዴሬሽን ብሔራዊ ዳኞች ኮሚቴ በአርቢትር ጌቱ ተፈራ ላይ የቅጣት ውሳኔ አስተላለፈ።

በኢትዮጵያ ኘሪምየር ሊግ 2 ሳምንት ጎንደር ላይ ፋሲል ከነማ ከሀዋሳ ከተማ የተደረገውን ጨዋታ በዋና ዳኝነት የመራው ፌዴራል አርቢቴር ጌቱ ተፈራ በጨዋታው የዳኝነት ስህተት ፈፅሟል በሚል 18 ወራት እገዳ ውሳኔ ተላልፎበታል።

ዳኛው በፋሲል ከነማ 3-1 አሸናፊነት የተጠናቀቀው ጨዋታ በአቻ ውጤት ቀጥሎ ባለበት ሰዓት በ87ኛው ደቂቃ የወሰኑት ውሳኔ ጨዋታውን ለ20 ደቂቃዎች አስተጓጉለው ነበር።

በተጨማሪም ለፋሲል ከነማ የፍፁም ቅጣት ምት በሰጡ ቅጽበት ውሳኔውን በመሻር ከክስተቱ በፊት የተቆጠረውን ጎል ሲያፀድቁ ፤ኋላ ላይ ደግሞ በድጋሚ ውሳኔያቸውን በመቀየር የፍፁም ቅጣት ምት እንዲመታ በማድረግ  አዳነ ግርማን ከሀዋሳ በኩል በቀይ ካርድ ማስወጣታቸው ይታወሳል።

በኢትዮጵያ ወንዶች ኘሪምየር ሊግ የ2011 ዓ.ም የ 2ኛ ሳምንት ጨዋታ ጥቅምት 25 ቀን 2011 ዓ.ም መርሃ ግብር በጎንደር ስታዲየ ም በፋሲል ከተማና በሐዋሳ ከተማ ክለቦች መካከል በተካሄደ ጨዋታ ላይ የጨዋታው ዋና ዳኛ በነበሩት ፌደራል ዋና ዳኛ ጌቱ ተፈራን አስመልክቶ የጨዋታው ታዛቢ ባቀረቡት የአፈጻፀም ሪፖርት አቅርበዋል።

በተጨማሪም ዋና ዳኛው ጨዋታውን በመሩት ወቅት ስለፈፀሙት የቴክኒክ ስህተት ያቀረቡትን የይቅርታ ደብዳቤ መሠረት በማድረግ የኢትዮጵያ እግር ኳስ ፌዴሬሽን ብሔራዊ ዳኞች ኮሚቴ ጥቅምት 27 ቀን 2011 ዓ.ም ባደረገው መደበኛ ስብሰባ በጉዳዩ ዙሪያ በጥልቀትና በስፋት ከተወያዩ በኋላ፡-

1ኛ. ፌዴራል ዋና ዳኛ ጌቱ ተፈራ የፈፀሙት ከፍተኛ የቴክኒክ ስህተት ከአንድ ሲኒየር ፌዴራል የእግር ኳስ ዳኛ የማይጠበቅ ጥፋት መሆኑን በማስታወስ፣

2ኛ. በፌዴራል ዳኛነት ማገልገል ከጀመሩበት ጊዜ አንስቶ የሚያስቀጣ ስህተት ፈጽመው የማያውቁና ባሳዩት የአፈፃፀም መሻሻል በኤሊት ዳኛነት ውስጥ መግባታቸውን እንዲሁም አስከዚህ ጨዋታ ድረስ የነበራቸውን መልካም አፈፃፀም ከግምት በማስገባት፣

3ኛ. ከጨዋታ ፍጻሜም በኋላ ስለፈፀሙት የቴክኒክ ስህተት በማመንና ለወደፊት ከዚህ ዓይነት ድርጊት ተቆጥበው የሚመደቡበትን ጨዋታ በአግባቡና በትክክል ለመምራት የሚዘጋጁ መሆናቸውን በጽሑፍ በማረጋገጣቸው በኢትዮጵያ እግር ኳስ ፌዴሬሽን የእግር ኳስ ዳኞች፣ ኢንስትራክተሮችና ታዛቢዎች የሥነ-ስርዓት እርምጃ ደንብ ክፍል 3 አንቀጽ 6 ተራ ቁጥር 6.8.2 እና 6.9 መሠረት ለ1 ዓመት ከ6 ወር ከእግር ኳስ ዳኝነት እንዲታገዱ የቅጣት ውሳኔ ማስተላለፋቸውን የሶከር ኢትዮጵያ ዘገባ ያመላክታል፡፡

 

You might also like