Fana: At a Speed of Life!

አሜሪካ በደቡብ አፍጋኒስታን በፈፀመችው የአየር ጥቃት 23 ንፁሃን ዜጎች ተገደሉ

አዲስ አበባ፣ህዳር 21፣ 2011 (ኤፍ.ቢ.ሲ) አሜሪካ በደቡብ አፍጋኒስታን ሄልማድ አካባቢ በታሊባን ታጣቂዎች ላይ በፈፀመችው የአየር ጥቃት የ23 ንፁኃን ዜጎች ህይዎት ማለፉ ተገለፀ።

ከዚህ በተጨማሪም በተፈፀመው ጥቃት ሶስት ሰዎች ላይ ከባድ የመቁሰል አደጋ መድረሱ ነው የተገለፀው።

በጥቃቱ ከሞቱት ሰዎች ውስጥም አብዛኛዎቹ ህፃናትና እናቶች መሆናቸውን በአፍጋኒስታን የተባበሩት መንግስታት ልዩ መልዕክተኛ ተናግረዋል።

እንደ አይን እማኞች ገለፃ በጥቃቱ ህይዎታቸው ያለፉ ሰዎች አብዛኛዎቹ ከአንድ ቤተሰብ መሆናቸው ነው የተነገረው።

የታሊባን ታጣቂዎች በአካባቢው በሚኖሩ ዜጎች ቤት ውስጥ በመግባት ጥቃት መፈፀማቸውን ተከትሎ የአሜሪካ ልዩ ሃይል ወታደሮች ድርጊቱን ለማስቆም የአየር ላይ ጥቃት ፈጽመዋል ተብሏል።

በአፍጋኒስታን ባለፉት ሰባት ወራት ውስጥ የታሊባን ታጣቂዎችን ለማስወገድ በተደረገ ዘመቻ ቢያንስ 649 የሚሆኑ ንፁሃን ዜጎች መገደላቸውን የተባበሩት መንግስታት ድርጅት አስታውቋል።

ይህንን ችግር ለማስወገድም የአፍጋኒስታን መንግስት ወታደሮች ከአሜሪካ ልዩ ሃይል ወታደሮች ጋር በጋራ በመሆን በታጣቂዎች ላይ የተለያዩ ጥቃቶችን ሲፈፅሙ ቆይተዋል።

ይሁን እንጅ ከቅርብ ዓመታት ወዲህ የታሊባን ታጣቂ ቡድን በአፍጋኒስታን የተለያዩ ግዛቶችን እየተቆጣጠረ ሲሆን፥  ብዙ የመንግስት ፖሊሶችንም እየገደለ መሆኑ ነው የተገለፀው ።

 

 

ምንጭ፦አልጀዚራ

You might also like
Comments
Loading...