Fana: At a Speed of Life!

ባንኩ ለእርሻ ሜካናይዜሽን በሊዝ ፋይናንሲንግ የሚሰጡ የእርሻ ማሽኖች ለሶስተኛ ወገን እንዲከራዩ ፈቀደ  

አዲስ አበባ ፣ ጥቅምት 28 ፣ 2011 (ኤፍ ቢ ሲ) የኢትዮጵያ ልማት ባንክ ለእርሻ ሜካናይዜሽን በሊዝ ፋይናንሲንግ የሚሰጡ የእርሻ ማሽኖች ለሶስተኛ ወገን ማከራየት አይቻልም ሲል አስቀምጦት የነበረውን ክልከላ አንስቷል።

ባንኩ ከዚህ ቀደም ብድር የሚፈልጉ ሰዎች ማሽኑን የሚገዙበትን ገንዘብ በቀጥታ ይሰጣቸው የነበረ ሲሆን፥ በሂደት ግን ተጠቃሚዎች ገንዘቡን ብድሩ ከታቀደለት አላማ ውጭ መጠቀም በመጀመራቸው አሰራሩን ቀይሯል።

በዚህም ባንኩ ተበዳሪዎች የሚፈልጉትን ማሽን ገዝቶ በማቅረብ ተገልጋዮቹ በኪራይ እንዲጠቀሙበት የሚያስችለውን የሊዝ ፋይናንሲንግ አገልግሎት ጀምሯል።

ይህ አሰራር ተበዳሪዎች የተከራዩትን ማሽን ሙሉ ዋጋ ከከፈሉ በኋላ ማሽኑ የራሳቸው ንብረት ሆኖ የሚቀርበት አሰራር ነው።

ለእርሻ የሚያገለግሉ የተለያዩ ማሽኖችን ለገበሬዎች ማቅረብም ባንኩ በሊዝ ፋይናንሲንግ ከሚሰጣቸው አገልግሎቶች መካከል የሚጠቀስ ነው።

ይሁን እንጂ ይህን የእርሻ ማሽን በብድር የወሰዱ ተጠቃሚዎች ይህን ማሽን ለራሳቸው ብቻ መጠቀም እንጅ ለሶስተኛ ወገን ማከራየት አይችሉም፤ ይህን ካደረጉ በባንኩ ህግ መሰረት ተጠያቂ ይሆናሉ።

ይሁን እንጅ ባንኩ ከ2010 ዓ.ም መጨረሻ ጀምሮ ይህን አሰራር መቀየሩን፥ በባንኩ የአነስተኛ እና መካከለኛ ኢንተርፕራይዝ ፋይናንሲንግ ምክትል ፕሬዚዳንት አቶ ተሾመ አለማየሁ ይናገራሉ።

ከባንኩ ያገኘነው መረጃ እንደሚያሳየው በሀገሪቱ ያለው የእርሻ ዘርፍ ዘመናዊ ቴክኖሎጂዎችን የሚጠቀም አይደለም፤ አምራቹም ይህን ቴክኖሎጂ ወይም ማሽኖችን ለመጠቀም የገንዘብ አቅም የለውም።

በእርሻ ዘርፉ ላይ የተሰማሩ የባንኩ ደንበኞችም አብዛኛውን ብድር ገንዘቡን ለመመለስ በማያስችል የእርሻ እንቅስቃሴ ላይ ስለሚያውሉት ብድሩን የመመለስ አቅማቸው ተገድቧል።

የባንኩ በሊዝ ፋይናንሲንግ የሰጠውን ማሽነሪ ተበዳሪው ለሶስተኛ ወገን እንዲያከራይ መፍቀዱ ግን ይህን ችግር በመፍታት የሰፋፊ እርሻውን ምርታማነት ለማሳደግ ያግዛል ነው የሚሉት።

እስካሁን ማሽኖችን በመውሰድ እየተጠቀሙ ያሉት ማህበራት ሲሆኑ፥ ባንኩ ከአምራች ማህበራት በተጨማሪ ግለሰቦች በእርሻ ሜካናይዜሽን ላይ ባይሰማሩም የእርሻ ማሽነሪዎችን በሊዝ ፋይናንሲንግ ብድር ወስደው የሚያከራዩበትን እድል አመቻችቷል።

ግለሰቦችም አስፈላጊውን መስፈርት አሟልተው ወደ ባንኩ በመምጣት ማሽኖችን በብድር እንዲገዙ እና እንዲያከራዩ ጥሪውን አስተላልፏል።

ባንኩ በሊዝ ፋይናንሲንግ ለሚሰማሩ ሰዎች ያለምንም ወረፋ መስተናገድ የሚችሉበት በቂ የገንዘብ አቅም እንዳለውም ገልጿል።

 

 

በትእግስት አብርሃም

 

You might also like
Comments
Loading...