Fana: At a Speed of Life!

በደቡብ ክልል የተለያዩ ዞኖች የሚስተዋለው ክልል የመሆን ውሳኔዎች ህገ-መንግስታዊ ቢሆኑም በጉባኤ ከተቀመጠው አቅጣጫ ውጭ ናቸው-ደኢህዴን

አዲስ አበባ ፣ ህዳር 17 ፣ 2011 (ኤፍ ቢ ሲ) የደቡብ ኢትዮጵያ ህዝቦች ዴሞክራሲያዊ ንቅናቄ /ደኢህዴን/ የዞን ምክር ቤቶች እያካሔዱት ያለው የክልል እንሁን ውሳኔ ለማስፈፀም አስቸጋሪ መሆኑን ገለፀ።

በደቡብ ክልል በተለያዩ ዞኖች የሚነሱና በየምክር ቤቶቹ የሚፀድቁ ክልል የመሆን ውሳኔዎች ምንም እንኳን ህገ-መንግስታዊ ቢሆኑም ደኢህዴን ካስቀመጠው አቅጣጫ ውጭ መሆናቸውን የማዕከላዊ ኮሚቴ ጽ/ቤት ሃላፊ አቶ ሞገስ ባልቻ ዛሬ በሰጡት መግለጫ አስታውቀዋል።

ውሳኔዎቹ እየተካሔዱ ያሉበት መንገድ ለአፈፃፀም አስቸጋሪ መሆናቸውንም ነው ያመለከቱት።

ሃላፊው  የድርጅቱ ስራ አስፈፃሚ በክልሉ ወቅታዊ ጉዳዮች ላይ አጭር አስቸኳይ ጉባኤ ማድረጉን በማስመልከት በሰጡት ጋዜጣዊ መግለጫ፥ እየተነሱ ባሉ ጥያቄዎች እና በሚስተዋሉ አለመረጋጋቶች ዙሪያ አቅጣጫ አስቀምጧል ብለዋል።

ጥያቄዎችን ለማስተናገድ ዝርዝር ጥናት በማድረግ ሕዝቡን ባሳተፈ መልኩ መከናወን አለበት ያሉት አቶ ሞገስ፥ለዚህም እንዲረዳ የተለያዩ አካላትን ያካተተ የጥናት ቡድን መቋቋሙን ተናግረዋል።

በክልልነት ጉዳዮች የፌደራል መንግሥትም ስለሚመለከተው ከሀገራዊው የለውጥ እንቅስቃሴው ጋር በቅንጅት እንደሚሰራ ገልፀዋል።

አሁን ያለው የክልልነት ጥያቄ ሒደት ለሕዝቡ  ይጠቅማል ወይ እና መፍትሔውስ ምን መሆን አለበት የሚለው የጥናት ውጤቱን መሠረት በማድረግ በሰከነ መልኩ መፈፀም እንደሚገባው ተናግረዋል።

ለክልሉ ሕዝብ የሚጠቅመውም ይኸው የሰከነ አካሔድ እንደሆነ ነው የተናገሩት።

የሕዝብ ጥያቄን መነሻ በማድረግ የሚቀሰቀሱ ግጭቶች ተቀባይነት እንደሌላቸው የገለፁት አቶ ሞገስ፥ የድርጅቱ ሥራ አስፈፃሚ የሕግ የበላይነት እንዲረጋገጥ እርምጃ እንዲወሰድ ተናግረዋል።

የክልሉ ሕዝብም ብሔር ተኮር አዝማሚያ ያለው ግጭት እንዲፈጠር የሚቀሰቅሱ አካላት መጠቀሚያ እንዳይሆን በንቃት መከታተል አለበት ነው ያሉት።

 

 

በታደሰ ሽፈራው

You might also like
Comments
Loading...