Fana: At a Speed of Life!

በከፍተኛ ትምህርት ተቋማት የሚስተዋሉ ችግሮችን ለመፍታት እየተሰራ ነው  

አዲስ አበባ ፣ ጥቅምት 28 ፣ 2011 (ኤፍ ቢ ሲ) በከፍተኛ ትምህርት ተቋማት የሚስተዋሉ ችግሮችን ለመፍታት እየሰራ መሆኑን የሳይንስና ከፍተኛ ትምህርት ሚኒስቴር ገለጸ።

ባለፉት ስድስት ወራት የህዝቡን የልማትና የዴሞክራሲ ጥያቄ ለመመለስ ለውጥ ማምጣት እንደሚያስፈልግ በመንግስት ታምኖባቸው ከተከናወኑ ተግባራት መካከል የሚኒስቴር መስሪያ ቤቶችን እንደ አዲስ ማዋቀር ይገኝበታል።

የሳይንስና ከፍተኛ ትምህርት ሚኒስቴርም ከትምህርት ሚኒስቴር ሁሉንም ዩኒቨርሲቲዎችና የቴክኒክና ሙያ ተቋማትን እንዲሁም፥ በሳይንስና ቴክኖሎጅ ሚኒስቴር ስር የሚገኙትን ሁለት ዩኒቨርሲቲዎችን በመጨመር በአዲስ መልክ ተቋቁሞ ወደ ስራ ገብቷል።

ከፋና ብሮድካስቲንግ ኮርፖሬት ጋር ቆይታ ያደረጉት ሚኒስትሯ ዶክተር ሂሩት ወልደማርያም፥ ሚኒስቴሩ ዘርፉን ያሻሽላሉ ያላቸውን እቅዶች አውጥቶ ወደ ተግባር መግባቱን ተናግረዋል።

ከእቅዶቹ መካከል በዘርፉ የሚስተዋለውን የትምህርት ጥራትና አግባብነት ችግሮች መፍታት ይገኝበታል።

ከዚህ አንጻርም ሚኒስቴሩ ከትምህርት ጥራት ጋር ተያይዞ የሚነሱ ጥያቄዎችን መመለስ የሚያስችሉ አሰራሮችን ለመዘርጋት እየሰራ መሆኑንም ነው ሚኒስትሯ የተናገሩት።

በተጨማሪም በሃገሪቱ የሚገኙ ከፍተኛ የትምህርት ተቋማት በምርምርና ቴክኖሎጅ ሽግግር፣ እንዲሁም የማህበረሰብ አቀፍ አገልግሎት አንጻር ያለባቸውን ክፍተት መሙላት የሚያስችል ስራ በእቅድ ውስጥ ተካቶ እየተሰራ መሆኑንም ጠቅሰዋል።

የሳይንስና ከፍተኛ የትምህርት ሚኒስቴር ተማሪዎች በዩኒቨርሲቲ ቆይታቸው ለትምህርታቸው ብቻ ትኩረት ሰጥተው እንዲማሩ የማድረጉን ስራ ትኩረት ሰጥቶ እንደሚሰራበትም ገልጿል።

እቅዱን ገቢራዊ ለማድረግ ከታለሙ ተግባራት መካከል ደግሞ በባለሙያዎች የተደገፈ የስነ ልቦና ማነቃቀቂያ መድረኮች ይገኙበታል።

እነዚህ በቀጣይ ለተማሪው ይሰጣሉ ተብለው የሚጠበቁ ተከታታይነት ያላቸው የማነቃቂያ ትምህርታዊ መድረኮች፣ ተማሪወች በከፍተኛ ትምህርት ቆይታቸው ለአላማቸው ብቻ ትኩረት ሰጥተው ጊዜያቸውን በአግባቡ እንዲጠቀሙ ይረዳል ተብሎ ይጠበቃል።

ከበጎ አድራጎት ስራዎች ጋር በተያያዘም የከፍተኛ ትምህርት ተቋማት ተማሪዎች የሚሳተፉባቸው መድረኮች ቀጣይነት ባለው መልኩ ለማዘጋጀት እየተሰራ ስለመሆኑም ሚኒስትሯ አንስተዋል።

ከዚህ ጋር ተያይዞም “አንድ ቅዳሜ ለማህበረሰቤ” በሚል ስያሜ የበጎ አድራጎት ተግባራት ይከናወናሉም ነው ያሉት።

ሚኒስቴር መስሪያ ቤቱ በቀጣይ እሰራቸዋለሁ ብሎ ያቀዳቸውን ተግባራት ለመተግበርና ስኬታማ ለማድረግ የሁሉም አካላት በጎ አስተዋፅኦ እንዳይለየውም ጠይቀዋል።

 

 

 

 

በአወል አበራ

 

You might also like
Comments
Loading...