Fana: At a Speed of Life!

በኢትዮጵያ በየአመቱ ከ177 ሺህ በላይ ሰዎች ጥራት ያለው ህክምና በማጣት ህይወታቸው ያልፋል – ጥናት

አዲስ አበባ ፣ ህዳር 21 ፣ 2011 (ኤፍ ቢ ሲ) በኢትዮጵያ በየአመቱ ከ177 ሺህ በላይ ሰዎች መዳን እየቻሉ ጥራት ያለው ህክምና በማጣት ህይወታቸው እንደሚያልፍ አንድ አለም አቀፍ ጥናት አመላከተ።

ከአኗኗር ዘይቤ ጋር በተያያዘ እየታዩ ያሉ የጤና እንከኖች ባለፉት አመታት በማደግ ላይ ባሉ ሃገራት በጤናው ዘርፍ የታየውን መሻሻል እንዳይቀጥል አድርጎታል።

የተለያዩ የማሻሻያ ስራዎች ተግባራዊ ቢደረጉም አሁንም ጥራት ያለው የጤና አገልግሎት በመስጠት ረገድ ደረጃቸው በጣም ዝቅተኛ ነው።

ላንሴት የተሰኘው አለም አቀፍ የጤና ኮሚሽን ዛሬ በአዲስ አበባ ይፋ ያደረገው ጥናትም ይህንኑ ነው የሚያሳየው።

በማደግ ላይ ባሉ ሃገራት መዳን እየቻሉ ጥራት ያለው የህክምና አገልግሎት በማጣት በየአመቱ 8 ነጥብ 6 ሚሊየን ሰዎች ለህልፈት እንደሚዳረጉ፥ በኢትዮጵያ የላንሴት ሊቀመንበር ፕሮፌሰር ማርጋሬት ከርክ ተናግረዋል።

በዚህ ሳቢያም በፈረንጆቹ 2015 ብቻ በአለም አቀፍ ደረጃ የ6 ትሪሊየን የአሜሪካ ዶላር የኢኮኖሚ ኪሳራ ማስከተሉንም ሊቀ መንበሯ ይናገራሉ።

በዚህ መልኩ ከተከሰተው ሞት ውስጥ 60 በመቶው በዝቅተኛ ጥራት ምክንያት የተከሰተ ሲሆን፥ ቀሪዎቹ የጤና ስርአቱን ባለመጠቀም የሚከሰቱ መሆናቸውም በጥናቱ ተጠቅሷል።

የላንሴት ጤና ኮሚሽን ጥናት እንደሚያሳየው በኢትዮጵያ በየአመቱ ከ177 ሺህ በላይ ሰዎች ጥራት ያለው ህክምና በማጣት መዳን እየቻሉ ህይወታቸው ያልፋል።

የእነዚህ ዜጎች ያለጊዜ ህልፈትም ሀገሪቱን ከፈረንጆቹ 2015 እስከ 2030 ድረስ 85 ቢሊየን ዶላር ያሳጣታል፤ ዜጎች በጤና ተቋማት አገልግሎት ጥራት ላይ ያላቸው አመኔታ ዝቅተኛ መሆኑም በጥናቱ ተካቷል።

የህክምና ቁሳቁሶች፣ ባለሙያ እና የተለያዩ መሰረተ ልማቶች ለጤና አገልግሎት ጥራት መለኪያ ናቸው ቢባሉም ሁኔታዎችን ከታካሚው አንጻር ማየቱ የጤና የጥራት ደረጃ መለኪያ እንደሚሆን፥ በጤና ጥበቃ ሚኒስቴር የጤና ጥራት አገልግሎት ዳይሬክተሩ ዶክተር ሙኒር ካሳ ያነሳሉ።

ለዚህም መሰረተ ልማትን አሟልቶ ህክምና ከመስጠት ባሻገር ሃኪሙ ታካሚው የሚሰማውን ስሜትና ያለበትን ደረጃ ጠይቆ መረዳት መቻሉ የጤና የጥራት ደረጃ መለኪያ እንደሆነም አስረድተዋል።

በኢትዮጵያ በደም ግፊት፣ ስኳር እና መሰል በሽታዎች ህይወታቸው የሚያልፉ ዜጎች ቁጥር እየተበራከተ ሲሆን፥ በህክምና ስህተት እና በህክምና ተቋማት ተደራሽነት ችግር የሚሞቱት ቁጥርም ቀላል አለመሆኑ ይነገራል።

ኢትዮጵያ ለጤናው ሽፋን የሰጠችው ትኩረት በአርዓያነት ቢያስነሳትም ጥራቱን የማስጠበቅ ስራዎች ላይ ግን ክፍተት እንዳለባት ነው የጤና ጥበቃ ሚኒስትሩ ዶክተር አሚር አማን ለጣቢያችን የተናገሩት።

የህክምና ግብዓቶች አለመሟላትና የባለሙያዎች የብቃት ማነስ እንዲሁም በሽታውን አውቆ የማከም እና በፍጥነት ምላሽ በመስጠት ረገድ ክፍተት ያለባቸው የህክምና ባለሙያዎች መኖራቸውንም ሚኒስትሩ ጠቅሰዋል።

የጤናውን ዘርፍ የአገልግሎት ጥራት ለማረጋገጥም ከፈረንጆቹ 2016 ጀምሮ ለአምስት አመት የሚተገበር ብሄራዎ የጤና ጥበቃ ጥራት ስትራቴጂ ተግባራዊ እየተደረገ ነው ብለዋል።

ይህም ለዘርፉ የሚያስፈልገውን መሰረተ ልማት ማሟላት፣ መድሃኒትን ጨምሮ የህክምና ቁሳቁስ እንዲሁም ባለሙያዎች ላይ የሚስተዋለውን ክፍተት መቅረፍን ያካተተ መሆኑንም ገልጸዋል።

በኢትዮጵያ የላንሴት ጤና ኮሚሽን ሊቀ መንበር ማርጋሬት ከርክ በበኩላቸው በዘርፉ ተጠያቂነትን ማስፈን ካልተቻለ ለውጥ ማምጣት እንደማይቻል ይጠቅሳሉ።

ላንሴት አለም አቀፍ የጤና ኮሚሽን ባደረገው ጥናት ኢትዮጵያ የጤና ስርዓቷን ለማሻሻል ይረዷታል ያላቸውን ነጥቦች ይፋ ያደረገ ሲሆን፥ የጤና ጥበቃ ሚኒስቴርም እንደ ግብዓት ወስጄ እሰራባቸዋለሁ ብሏል።

 

 

 

በፋሲካው ታደሰ

 

 

 

You might also like
Comments
Loading...