Fana: At a Speed of Life!

በኢትዮጵያና ኤርትራ መካከል የሚደረገውን የገቢና ወጪ ንግድ ለመቆጣጠር ህግ እየተረቀቀ ነው

አዲስ አበባ፣ ጥቅምት 23፣ 2011 (ኤፍ.ቢ.ሲ) በኢትዮጵያና ኤርትራ መካከል የሚደረገውን የገቢና ወጪ ንግድ ለመቆጣጠር ህግ እየተረቀቀ መሆኑ ተገልጿል።

በኢትዮጵያና ኤርትራ ድንበር ያለውን የገቢና ወጪ ንግድ ለመቆጣጠር የህግ ማዕቀፍ እየተዘጋጀ መሆኑን የገቢዎች ሚኒስቴር አስታውቋል።

በአገሮቹ መካከል ለሁለት አስርት ዓመታት ተቋርጦ የነበረው ግንኙነት በሁለቱ መንግስታት በተደረሰ የሰላም ስምምነት መሰረት ድንበሮች ተከፍተው የህዝብ ለህዝብ ግንኙነት ተጀምሯል።

በሁለቱ አገሮች መካከል የሚደረጉ የገቢና ወጪ ዕቃዎችን ለመቆጣጠር የገቢዎች ሚኒስቴር የህግ ማዕቀፍ እያዘጋጀ ነው ተብሏል።

ኢትዮጵያ የሚገቡትንም ሆነ ወደ ኤርትራ የሚላኩትን ዕቃዎች ለመቆጣጠር የሚያስችል ህግ እየተረቀቀ መሆኑ የገቢዎች ሚኒስትር ወይዘሮ አዳነች አቤቤ ገልጸዋል።

በዚህም ወደ አገር የሚገቡትም ሆነ ወደ ኤርትራ የሚላኩ ዕቃዎች ከሌሎች አገሮች ጋር እንደሚደረገው የንግድ ልውውጥ የቀረጥ ስርዓት ይዘረጋል ብለዋል።

እንደ ሚኒስትሯ ገለጻ የህግ ማርቀቅ ሥራ እንደተጠናቀቀ በፍጥነት ወደ ተግባር ለመግባት በሚኒስቴሩ በኩል ዝግጅት እየተደረገ ነው።

የንግድና ኢንዱስትሪ ሚኒስትር ዴኤታ ዶክተር መብርሃቱ መለስ እንዳሉት አሰራር እስከሚዘረጋ ድረስ በድንበር በኩል የሰዓት እና የዕቃ ዓይነቶች ላይ ገደብ ተጥሏል።

ኢትዮጵያና ኤርትራ የንግድ ልውውጥ ስምምነት በመንግስታት ደረጃ ለማድረግ የሚያግዝ መረጃም በሁለቱ አገሮች ድንበር አካባቢ ያለውን ተጨባጭ ሁኔታ ከፌደራልና ከትግራይ ክልል መንግስት ተቋማት በተውጣጡ ሙያተኞች መረጃ መሰብሰባቸውን ተናግረዋል።

የባለሙያዎቹን መረጃ መሰረት በማድረግ የድንበር ግንኙነት በአሁኑ ወቅት ከጠዋቱ 12 ሰዓት እስከ ምሽቱ 12 ሰዓት ድረስ ብቻ ክፍት እንዲሆን ተደርጓል።

ኢትዮጵያ የአሰብንና የምፅዋ ወደብን መጠቀም እንድትችል በሁለቱ መንግስታት መካከል የተለያዩ ተግባራት በመከናወን ላይ መሆናቸው ይታወቃል።

ምንጭ፦ ኢ.ዜ.አ

You might also like
Comments
Loading...