Fana: At a Speed of Life!

በአሜሪካ የአፍሪካ ጉዳዮች ረዳት ተጠሪ ሚኒስትር ቲቦር ናሽ በኢትዮጵያ የነበራቸው ቆይታ ስኬታማ እንደነበር ተናገሩ

አዲስ አበባ፣ ህዳር 21፣ 2011 (ኤፍ.ቢ.ሲ) በአሜሪካ የአፍሪካ ጉዳዮች ረዳት ተጠሪ ሚኒስትር ቲቦር ናሽ በኢትዮጵያ የነበራቸው ቆይታ ስኬታማ እንደነበር ተናገሩ።

በአሜሪካ የአፍሪካ ጉዳዮች ረዳት ተጠሪ ሚኒስትር ቲቦር ናሽ አሁን ላይ ኢትዮጵያ እያደረገች ያለው ሁለንታናዊ ለውጥ፥ ለመላው አፍሪካ ምሳሌ መሆን እንዳለበት ና አሜሪካም በአድናቆት እንደምትመለከተው አስታውቀዋል።

የለውጡ መሪ የሆኑት ጠቅላይ ሚኒስትር ዶክተር አብይ አህመድ በሀገር ውስጥም ሆነ በውጭ ያመጡት ለውጥ ትልቅ ምስጋና የሚገባው ነው ሲሉም ገልጸዋል።

ኢትዮጵያ ኤርትራና ሶማሊያን ጨምሮ ከቀጠናው ሀገራት ጋር ያላትን ግንኙነት ወደ ተሻለ ደረጃ ከፍ ያደረጉት ጠቅላይ ሚኒስትሩ ሁሉም ኢትዮጵያውያን አገሪቱ አሁን ለደረሰችበት ለውጥ አበርክቶ እንዳለው ያስተላለፉት መልዕክትና የጀመሩት ለውጥ አስደናቂ መሆኑንም አስርድተዋል።

ጠቅላይ ሚኒስትሩ የፖለቲካ ፓርቲዎችን ጠላት ሳይሆኑ፥ ተፎካካሪ ናቸው በሚል አብሮ መስራት መጀመራቸው ለአፍሪካ ሀገራት መሪዎች ትልቅ ትምህርት ሊሆን እንደሚችልም ተናግረዋል።

አሁን ላይ ኢትዮጵያ ውስጥ ላለው የለውጥ ሂደት አስፈላጊ በሆነው መንገድ ሁሉ አሜሪካ ድጋፏን እንደምትቸርና ወቅታዊ ሁኔታውን ለዓለም በማስተገባት ጭምር የሚጠበቅባትን ሚና ለመወጣት ዝግጁ መሆኗን ቲቦር ናሽ አረጋግጠዋል።

በተለይም የሰው ልጅ አዕምሮ ላይ የምናደርገውን ኢንቨስትመንት ተጠናክሮ እንደሚቀጥል በመጠቆም የአሜሪካ ኩባንያዎችም በኢትዮጵያ ኢንቨትት እንዲያደርጉ እና የስራ እድል እንዲፈጥሩ እናበረታታለን ብለዋል።

በፈረንጀጆቹ አቆጣጠር ከ1999 እስከ 2002 በኢትዮጵያ የአሜሪካ አምባሳደር የነበሩት ቲቦር ናሽ በወቅቱ ኤርትራን ለመጎብኘት ከፍተኛ ፍላጎት ቢኖራቸውም ሁለቱ ሀገራት የነበሩበት ወቅታዊ ሁኔታ እንዳልፈቀደላቸው እና ያም እንደሚቆጫቸው ተናግረው አሁን ግን በኢትዮጵያ አየር መንገድ ወደ ኤርትራ ለመጓዝ መዘጋጀታቸውንና በዚህም ደስተኛ መሆናቸውን ነው የገለጹት።

የአሜሪካ አፍሪካ ጉዳዮች ረዳት ተጠሪ ሚኒስትር ቲቦር ናሽ በዛሬው ዕለት ወደ ጅቡቲ የሚያቀኑ ሲሆን፥ በዚያም በሁለትዮሽ ጉዳዮች ዙሪያ እንደሚመክሩ አስታውቀዋል።

የጅቡቲ ቆይታቸውንም አጠናቀው ወደ ኤርትራ በማቅናት በአስመራና ዋሽንግተን መካክል ያለውን የዲፕሎማሲያዊ ግንኙነት ለማሻሻል የሚያስችሉ ሁኔታዎችን እንደሚመክሩም ነው የተገለጸው።

ኬኒያ የአሜሪካ የአፍሪካ ጉዳዮች ረዳት ተጠሪ ሚኒስትሩ የአፍሪካ የመጨረሻ መዳረሻ መሆኗም ታውቋል።

በባህሩ ይድነቃቸው

You might also like
Comments
Loading...