Fana: At a Speed of Life!

በተለያዩ ክልሎች ሰባት የመስኖ ልማት ኮሪደሮች ተለይተዋል

አዲስ አበባ ፣ ጥቅምት 30 ፣ 2011 (ኤፍ ቢ ሲ) በተለያዩ ክልሎች ሰባት የመስኖ ልማት ኮሪደሮች መለየታቸውን የውሀ መስኖ እና ኢነርጅ ሚኒስቴር አስታወቀ።

ኢትዮጵያ ያላትን የውሃ ሃብት በአግባቡ በመጠቀም ምርታማነቷን ለማሳደግ ለመስኖ ልማት ልዩ ትኩረት ተሰጥቶ እየተሰራ መሆኑን የውሃ መስኖና ኢነርጅ ሚኒስቴር ይገልጻል።

የውሀ መስኖ እና ኢነርጅ ሚኒስትሩ ዶክተር ኢንጅነር ስለሽ በቀለ ለጣቢያችን እንደተናገሩት፥ በዚህ አመት የተለያዩ የመስኖ ልማት ፕሮጀክቶችን በተለይም የልማት ኮሪደሮችን ስራ ለማከናወን እየተሰራ ነው።

ከዚህ ጋር ተያይዞም ውሀ ገብ የሆኑ ሰባት አካባቢዎች ተመርጠው የዲዛይን ስራ እየተሰራላቸው ሲሆን፥ አካባቢዎቹ ውሀ ገብ የሆኑና ለስራ እድል ፈጠራው ትልቅ አስተዋፅኦ የሚያበረክቱ ናቸው ተብሏል።

ለመስኖ ልማት ኮሪደር ተብለው የተለዩት ቦታዎችም፣ በአማራ፣ ኦሮሚያ፣ ደቡብ፣ ቤኒሻንጉል፣ አፋር እና ትግራይ ክልሎች እንደሚገኙ፥ በሚኒስቴሩ የህዝብ ግንኙነት እና ኮሙዩኒኬሽን ዳይሬክተር አቶ ብዙነህ ቶልቻ ተናግረዋል።

የልማት ኮሪደሮቹን በመጠቀምም የተለያዩ ምርቶችን በአመት እስከ 3 ጊዜ ማምረት የሚቻል ሲሆን፥ ድርቅን ለመከላከልም የራሳቸው ሚና ይኖራቸዋል ነው የተባለው።

በተለይም እንደ አፋር ክልል ያሉ ቆላማ ቦታዎች ኮሪደሮቹ እንዲለሙ የሚፈለግባቸው እና ቅደሚያ የተሰጣቸው ቦታዎች መሆናቸውን ሚኒስትሩ ገልጸዋል።

እነዚህ ኮሪደሮች በአንድ ጊዜ 32 ሺህ ሄክታር መሬትን ማልማት የሚችሉ ሲሆን፥ ለግንባታቸው ማስጀመሪያ 2 ቢሊየን ብር ተመድቧል።

አሁን ላይም የልማት ኮሪደሮቹን ግንባታ ለማስጀመር የተለያዩ የዲዛይን ስራዎች እየተከናወኑ ሲሆን፥ የፕሮጀክቶቹ የዲዛይን ክለሳ ስራ ሲጠናቅቅም ግንባታቸው እንደሚጀመር ተገልጿል።

ሚኒስቴር መስሪያ ቤቱም በበጀት አመቱ ወደ 10 የሚጠጉ የመስኖ ልማት ፕሮጀክቶችን ግንባታ ለማከናወን እቅድ ይዞ እየተንቀሳቀሰ መሆኑን ገልጿል።

በመስኖ ልማት ፕሮጀክቶች ግንባታ ላይ የሚታዩ መጓተቶችን ለመቅረፍ እየሰራሁ ነው ያለው ሚኒስቴሩ፥ በበጀት አመቱ ለመስኖ ልማት ፕሮጀክቶች ግንባታ ማስጀመሪያም 8 ነጥብ 6 ቢሊየን ብር በጀት መመደቡን አስታውቋል።

 

 

 

በዙፋን ካሳሁን

 

 

 

 

You might also like
Comments
Loading...