Fana: At a Speed of Life!

በሞያሌና ሚሌ በኩል የገቡ 15 ሚሊየን ብር የሚያወጡ የኮንትሮባንድ እቃዎች ተያዙ

አዲስ አበባ፣ ጥቅምት 30፣ 2011 (ኤፍ.ቢ.ሲ) በሞያሌ እና በሚሌ በኩል የገቡ 15 ሚሊየን ብር የሚያወጡ በኮንትሮባንድ የገቡ የተለያዩ እቃዎች ተያዙ።

በገቢዎች ሚኒስቴር የትምህርትና ኮሙዩኒኬሽን ዳይሬክተር አቶ ኤፍሬም መኮንን ለፋና ብሮድካስቲንግ ኮርፖሬት እንደተናገሩት፥ 8 ነጥብ 9 ሚሊየን ብር የሚያወጣ የኮንትሮባንድ እቃ በሞያሌ በኩል ገብቶ ሀዋሳ ላይ በህብረተሰቡ ጥቆማ ተይዟል።

እነዚህ እቃዎች አልባሳት፣ መድሃኒቶች፣ የኤሌክትሮኒክስ እቃዎች እና 35 ሞተር ሳይክሎች ናቸው።

በተጨማሪም በሚሌ በኩል 4 ነጥብ 8 ሚሊየን ብር የሚያወጡ 11 ሺህ ፓኬት ሺሻ እና ሌሎች እቃዎች ተይዘዋል።

እነዚህ እቃዎች ከጥቅምት 16 እስከ ዛሬ ድረስ የተያዙም ናቸው ብለዋል።

በሌላ በኩል የዲፕሎማቲክ መብትን በመጠቀም አንድ ኤምባሴ 10 ሚሊየን ብር የሚያወጡ የተለያዩ እቃዎችን በህገወጥ መንገድ አስገብቶ መያዙንም ነው አቶ ኤፍሬም የገለፁልን።

ስሙን ያልጠቀሱት ይህ ኤምባሲ የዲፕሎማቲክ መብትን በመጠቀም ሀገር ውስጥ መግባት የማይችሉ የመኪና መለዋወጫዎች፣ የደህንነት እና መደበኛ ካሜራዎችን  አስገብቶ መገኘቱን ገልፀዋል።

አቶ ኤፍሬም ለሚኒስቴሩ የሚደርሰው ጥቆማ በየጊዜው እየጨመረ በመምጣቱ እና መስሪያ ቤቱ ያንን መሰረት በማድረግ እያከናወነ ባለው ጥብቅ ክትትል እና ቁጥጥር ወደ ሀገር ውስጥ በኮንትሮባንድ መልክ ገብተው የሚያዙ እቃዎች መጠን እየጨመረ መምጣቱን ተናግረዋል።

 

በታሪክ አዱኛ

 

You might also like
Comments
Loading...