Fana: At a Speed of Life!

ቅዱስ ጳውሎስ ሆስፒታል በ200 ሚሊየን ብር ያስገነባው የሜዲካል ጋዝ ማምረቻ ተመረቀ

አዲስ አበባ፣ ጥቅምት 30፣ 2011 (ኤፍ.ቢ.ሲ) በ200 ሚሊየን ብር ወጪ በቅዱስ ጳውሎስ ሆስፒታል ሚሊኒየም ሜዲካል ኮሌጅ የተገነባው የኦክስጅን፣ የቫኪዩምና የሜዲካል አየር ማምረቻና ማከፋፈያ ተመረቀ።

በኢፌዴሪ የጤና ሚኒስትር ዶክተር አሚር አማን የተመረቀው ይህ ማምረቻ፥ ለ500 አልጋዎች ከአንድ ቦታ የኦክስጅን፣ የቫኪዩምና የሜዲካል አየር አግልግሎት የሚሰጥ እንዲሁም በየቀኑ 100 ሲሊንደሮችን የመሙላት ዓቅም ያለው ነው።

በሆስፒታሉ በህሙማን መኝታ ክፍል እስከ አልጋቸው ራስጌ ድረስ የሚያደርሱ መስመሮች የተዘረጉ ሲሆን፥ ይህም ትላልቅ የጋዝ ሲሊንደሮች በህሙማንና በቀዶ ህክምና ክፍሎች ማስቀመጥን ያስቀራል።

ኮሌጁ የሜዲካል ጋዝ ማምረቻ ማዕከል ለሌሎች የጤና ተቋማት በሲሊንደር እየሞላ ለሽያጭ ማቅረብ ያስችለዋል።

በሃይል መቆራረጥ ምክንያት ምርቱ እንዳይስተጓጎል ማምራቸው ሁለት ጄኔረተሮችም የተገጠሙለት ሲሆን፥ የሜዲካል ጋዝ ማምረቻና ማከፋፈያ መስመሮች ቢበላሹ የሚጠግኑ የኮሌጁ ባለሙያዎችም መዘጋጀታቸውን የቅዱስ ጳውሎስ ሆስፒታል ሚሊኒየም የህክምና ኮሌጅ አስታውቋል።

ኮሌጁ ዘመናዊ የሕክምና ቴክኖሎጂ መሳሪያዎችን በመጠቀም ጥራት ያለው የህክምና ተቋም ለመሆንና የህክምና መንደርን ለመመስረት ካቀዳቸው እቅዶች መካከል ይህ ማዕከል አንዱ መሆኑንም አመላክቷል።

You might also like
Comments
Loading...