Fana: At a Speed of Life!

የኮፓ ሊበርታዶሬስ ፍጻሜ የመልስ ጨዋታ በሳንቲያጎ በርናባው ይደረጋል

አዲስ አበባ ህዳር 21፣ 2011(ኤፍ.ቢ.ሲ) የኮፓ ሊበርታዶሬስ የፍጻሜ የመልስ ጨዋታ በማድሪድ ስታዲየም ሳንቲያጎ በርናባው እንዲካሄድ ተወሰነ።

በቦነስ አይረሶቹ ቦካ ጁኒየርስ እና ሪቨር ፕሌት ክለቦች መካከል የሚደረገው ጨዋታ በሚቀጥለው ሳምንት ህዳር 30 ቀን በበርናባው ስታዲየም ይደረጋል ተብሏል።

የደቡብ አሜሪካው የክለቦች ፍጻሜ አህጉር እንዲሻገር ያደረገው ባለፈው ሳምንት የሪቨር ፕሌት ጽንፈኛ ደጋፊዎች፥  በቦካጁኒየርስ የቡድን አውቶቡስ ላይ ጥቃት መፈጸማቸውን ተከትሎ ነው።

በወቅቱ በተፈጸመው ጥቃት የቦካ ተጫዋቾች በመስታወት ስብርባሪዎች እና ፖሊስ በተጠቀመው አስለቃሽ ጭስ ምክንያት ለጉዳት ተዳርገዋል።

ይህን ተከትሎም ጨዋታው ሳይካሄድ ለሌላ ጊዜ እንዲካሄድ ተላልፎ ነበር።

አሁን ላይም ጨዋታው በገለልተኛ ሜዳ ከ9 ሺህ 600 ኪሎ ሜትር በላይ በሆነ ርቀት እንዲካሄድ ተወስኗል።

የቦነስ አይረስ ከንቲባ ሮድሪጌዝ ላሬታ ግጭት ቀስቃሾቹን የአርጀንቲና የእግር ኳስ ማፍያ ሲሉ ገልጸዋቸዋል፡፡

የስፔን ጠቅላይ ሚኒስትር ፔድሮ ሳንቼዝ በበኩላቸው የሁለቱን ቡድኖች የፍጻሜ ጨዋታ ለማስተናገድ ሀገራቸው ዝግጁ መሆኗን አስታውቀዋል፡፡

ኮፓ ሊበርታዶሬስ የደቡብ አሜሪካው ትልቁ የክለቦች ውድድር ሲሆን፥ በአውሮፓ ቻምፒየንስ ሊግ ደረጃ የሚታይና በስፖርት አፍቃሪው ዘንድ ተወዳጅና ተጠባቂ ውድድር ነው።

የተፈጠረውን ግጭት ተከትሎ ቦካ ጁኒየርስ ዋንጫውን ያለምንም ጨዋታ እንዲሰጠው የጠየቀ ቢሆንም በደቡብ አሜሪካ እግርኳስን የሚያስተዳድረው አካል ጥያቄውን ውድቅ አድርጎታል፡፡

ቦካ ጁኒየርስ እና ሪቨር ፕሌት በፍጻሜው የመጀመሪያው ጨዋታ በቦካ ሜዳ ሁለት አቻ መለያየታቸው ይታወሳል።

 

ምንጭ፦ቢቢሲ

በአብርሃም ፈቀደ

You might also like
Comments
Loading...