Fana: At a Speed of Life!

ሁለት ሚሊየን የማዕከላዊ አፍሪካ ሪፐብሊክ ዜጎች አስቸኳይ የምግብ እርዳታ ይሻሉ

አዲስ አበባ፣ ጥቅምት 29፣ 2011 (ኤፍ.ቢ.ሲ) ከሁለት ሚሊየን በላይ የሚሆኑ የማዕከላዊ አፍሪካ ሪፐብሊክ ዜጎች አስቸኳይ የምግብ እርዳታ የሚያስፈልጋቸው መሆኑን የአለም የምግብ ፕሮግራም አስታውቋል።

የእርስ በርስ ጦርነት ውስጥ የምትገኘው ማዕከላዊ አፍሪካ ሪፐብሊክ ዜጎች ከመቸውም ጊዜ በበለጠ ለአስከፊ ረሃብ አደጋ መጋለጣቸውን የአለም የምግብ ፕሮግራም ቃል አቀባይ ሄርቬ ቨርሆሴል ተናግረዋል።

በሀገሪቱ ከአውሮፓውያኑ አቆጣጠር 2014 ወዲህ 1.9 ሚሊየን ዜጎች አስቸኳይ የምግብ እርዳታ ሲያስፈልጋቸው ይህ ለመጀመሪያ ጊዜ መሆኑን ቃል አቀባዩ አስታውቀዋል።

በመሆኑም የዓለም አቀፉ ማህበረሰብ ለእነዚህ ዜጎች አስቸኳይ ሰብዓዊ እርዳታ የማያደርግ ከሆነ ሁኔታው አስከፊ ደረጃ ላይ ሊደርስ አንደሚችል አስጠንቅቀዋል።

በፈረንጆቹ 2013 በማዕከላዊ አፍሪካ ሪፐብሊክ የሚገኙ ታጣቂዎች በወቅቱ የሀገሪቱ ፕሬዘዳንት ላይ የመፈንቅለ መንግስት ሙከራ ማድረጋቸው ይታወሳል።

ይህን ተከትሎም በተለያየ ጊዜ በሚፈጠር ግጭት በሺዎች የሚቆጠሩ ዜጎች ለህልፈት ተዳርገዋል።

አራት ሚሊየን የሚሆኑ ሰዎች በሚኖሩባት ማዕከላዊ አፍሪካ ሪፐብሊክ ፥18 የሚደርሱ ታጣቂ ቡድኖች እርስ በርሳቸው ይፋለማሉ።

በዚህ ምክንያትም በርካታ ህዝቦች ለረሃብ አደጋና ለስደት መዳረጋቸውን መረጃዎች ያመላክታሉ።

ባለፈው ሳምንት እንደ አዲስ ባገረሸው የእረስ በርስ ጦርነት ምክንያት እንኳን 10 ሺህ ሚሆኑ የሀገሪቷ ዜጎች ከመኖሪያ ቀያቸው ተፈናቅለዋል።

በማዕከላዊ አፍሪካ ሪፐብሊክ በአሁኑ ወቅት 620 ሺህ የሚሆኑ ዜጎች ከመኖሪያ ቀያቸው የተፈናቀሉ ሲሆን፥ከነዚህ ውስጥም ከ10 ሰዎች መካከል ስድስቱ ለከፋ የምግብ እጥረት ችግር መዳረጋቸውን የአለም የምግብ ፕሮግራም ያወጣው ሪፖርት ያመላክታል።

ምንጭ፦presstv.com

You might also like
Comments
Loading...