Fana: At a Speed of Life!

ዴር ሱልጣን ትናንት፣ ዛሬና ነገም የኢትዮጵያ ገዳም ነው-ቅዱስ ሲኖዶሱ

አዲስ አበባ፣ ጥቅምት 21፣ 2011 (ኤፍ.ቢ.ሲ) የኢትዮጵያ ኦርቶዶክስ ተዋህዶ ቤተክርስቲያን ቅዱስ ሲኖዶስ ከጥምቅምት 11 እስከ 21 2011 ዓመተ ምህረት ሲያካሂድ የነበረውን መደበኛ ስብሰባ የተለያዩ ውሳኔዎችን በማሳለፍ አጠናቀቀ።

የቅዱስ ሲኖዶሱ ስብሰባ  መጠናቀቁን ተከትሎ በዛሬው ዕለት መግለጫ ተሰጥቷል።

በዚህም ሲኖዶሱ ባካሄደው ስብሰባ የብፁዓን አባቶች የስራ ምደባና ዝውውር ማካሄዱ ተጠቁሟል።

መንግስት በሀገሪቱ አንዳንድ ክፍሎች  ለሚከሰቱ ግጭቶችና ችግሮች አፅንኦት በመስጠት አስፈላጊው መፍትሄ እንዲገኝ  እንዲሰራ ሲኖዶሱ  አሳስቧል።

በሀገሪቱ ውስጥ የሚታዩ ችግሮች እየተባባሱ ከሄዱ አስቸጋሪ ሁኔታዎች ይፈጠራሉ ያለው ሲኖዶሱ፥ ለዚህም በቤተክርስቲያኗ ከመቸውም ጊዜ በበለጠ የወንጌል ስምሪት ተጠናክሮ እንዲቀጥል አሳስቧል።

በኢትዮጵያና ኤርትራ ኦርቶዶክስ ተዋህዶ  ቤተክርስቲያናት  እንዲሁም በምዕመናኖቻቸው መካከል በመንፈሳዊና ማህበራዊ ጉዳዮች የተሻለ መቀራረብ መፍጠር የሚያስችል ኮሚቴ እንደዋቀር ምልዓተ ጉባዔው መስማማቱ ተጠቁሟል።

እንዲሁም ከዚሁ ጋር በተያያዘ ከህዳር 1 እስከ ህዳር 7 ቀን 2011 ዓመተ ምህረት ድረስ በመላ ሀገሪቱ በሚገኙ አብያተ ክርስቲያናት ጸሎተ ምሕላ እንዲደረግ መመሪያ አስተላልፏል።

ቅዱስ ሲኖዶሱ አቤቱታ በቀረበባቸው አህጉረ ስብከቶች ላይ መርምሮና አጣርቶ መፍትሄ መስጠቱ ተነግሯል።

ቤተክርስቲያኗ በመንፈሳዊና ማህበራዊ ዘርፎች ከፍተኛ ስራዎች መስራቷን ያስታወቀው ሲኖዶሱ፥ በቀጣይ የቤተክርስቲያኗን ተልዕኮ ለማስፋት ከላይ እስከ ታችኛው የቤተ ክርስቲያኗ አስተዳደር የሚተገበር ሁለንተናዊ ችግርና መሪ እቅድ መዘጋጀቱ የተመለከተ ሲሆን፥ ይህም ስራ እንዲቀጥል ተወስኗል።

ሲኖዶሱ በሀገር ውስጥም ሆነ በውጭ ሀገራት ያለችው ቤተክርስቲያን በአንዲት ቀኖናዊት ቤተክርስቲያን በማዕከል እንድትመራ ወስኗል።

በሁለቱ ሲኖዶሶች ልዑካን በሀምሌ ወር የተደረሰውን ስምምነት ተቀብሎ በሰነድነት እንዲቀመጥም  መወሰኑ ተገልጿል።

ጉባዔው በእየሩሳሌም ዴር ሱልጣን ገዳም  ላይ በግብፅ ኮፕቲክ ኦርቶዶክስ ቤተክርስቲያን እየቀረበ ያለው የባለቤትነትና ጥያቄና ስራዎች የማስተጓገል የሚደረገው ጥረት ሊቆም እንደሚገባ አሳስቧል።

ዴር ሱልጣን ትናንት፣ ዛሬና ነገም የኢትዮጵያ ገዳም መሆኑን  ያመለከተው መግለጫው የኢትዮጵያ መንግስትም የጉዳዩ ባለቤት በመሆኑ መፍትሄ እንዲያስገኝ ጠይቋል።

ከዚህ ባለፈ ቅዱስ ሲኖዶሱ የመሰነጣጠቅ ችግር ለደረሰበት የቅዱስ  ለላልይበላ  አብያተ ክርስቲያን የሚውል የ20 ሚሊየን ብር ድጋፍ ያደረገ ሲሆን፥ በተመሳሳይ በርእሰ አድባራት ወገዳማት አክስሙ ጽዮን ቤተ ክርስቲያን ለሚገነባው ሙዚየም የስራ ማከናወኛ 20 ሚሊየን ብር ድጋፍ እንዲደረግ ወስኗል።

ሲኖዶሱ ሲያካሂድ በቆየው ጉባዔ ማጠናቀቂያ ፕሮግራም ላይ ለምክትል ከንቲባ ኢንጅነር ታከለ ኡማ የእውቅናና የምስጋና ሰርተፍኬት አበርክቷል።

በዘመን በየነ

You might also like
Comments
Loading...