Fana: At a Speed of Life!

የኢንደስትሪ ፓርኮች ልማት ኮርፖሬሽን ከባለድርሻ አካላት ጋር አብሮ ለመስራት የሚያስችለውን ውይይት አደረገ

አዲስ አበባ፣ ጥቅምት 1፣ 2011 (ኤፍ.ቢ.ሲ) የኢንደስትሪ ፓርኮች ልማት ኮርፖሬሽን ከዘርፉ ባለድርሻ አካላት ጋር በቀጣይ አብሮ ለመስራት የሚያስችለውን ውይይት አደረገ።

ኮርፖሬሽኑ ከከተማ ልማትና ቤቶች ሚኒስቴር፣ ከኢንዱስትሪ ሚኒስቴር፣ከሰራተኛና ማህበራዊ ጉዳዮች ሚኒስቴር፣ ከትራንስፖርት ሚኒስቴር እና ከሌሎች የሚመለከታቸው አካላት ከተውጣጡ ባለድርሻ አካላት ጋር ነው የተወያየው።

በውይይቱም በኮርፖሬሽኑና በባለድርሻ አካላቱ መካከል የተቀናጀ እቅድ አለመር እና የግንኙነት ክፍተት መኖሩ በዘርፉ ላይ የሚነሱ ችግሮች እንዲቀጥሉ ምክንያት ሆኗል ተብሏል።

በውይይት መድረኩ ላይ በሀገሪቱ የተገነቡት እና በመገንባት ላይ የሚገኙት የኢንዱስትሪ ፓርኮች ለሀገር እድገት አይነተኛ ሚና ቢጫወቱም ከባለድርሻ አካላት ጋር በቅንጅት አለመስራት ግን ለዘርፉ ማነቆ መሆኑ ተነስቷል።

በውይይቱ ላይ የተነሱ ሌሎች ችግሮችንና በቀጣይም እነዚህ ችግሮች እንዳያጋጥሙ የመፍትሄ አቅጣጫዎች ላይም ምክክር ተደርጓል።

በቀጣይም አሁን በስራ ላይ ያሉ የኢንዱስትሪ ፓርኮችን ማጠናከር፣ ግንባታቸው የተጀመሩ ፓርኮች በተያዘላቸው ጊዜ እንዲጠናቀቁ ማድረግ እና አዳዲስ የኢንደስትሪ ፓርኮች ግንባታ ማስጀመር የሚለው ላይ በትኩረት እንደሚሰራም ተነግሯል።

በዚህ ወቅትም በተለይም የኢንዱስትሪ ፓርኮች ግንባታ ከመጀመሪያ ጀምሮ ተጠናቀው ምርት ጀምረው ወደ ኤክስፖረት እስኪገቡ ድረስ በመንገድ፣ በውሃ፣ በኤሌክትሪክ በሌሎች ዘርፎች የሚሰሩ የባለድርሻ አካላት ሚና ከፍተኛ በመሆኑ በቅንጅት መስራት እንደሚያስፈልግም ተነስቷል።

የኢንደስትሪ ፓርኮች ልማት ኮርፖሬሽን ምክትል ስራ አስፈፃሚ አማረ አሰግድ ለፋና ብሮድካስቲንግ ኮርፖሬት እንደተናገሩት፥ ከባለድርሻ አካላት ጋር ተቀናጅቶ አለመስራት ለዘርፉ ማነቆ መሆኑን አንስተዋል።

የዛሬው የውይይት አላማም በቀጣይ ከባለድርሻ አካላት ጋር በቀጣይ የጋራ እቅድ በማዘጋጀት በትብብር መስራት በሚቻልባቸው ጉዳዮች ላይ መምከር እና አቅጣጫ ለማስቀመጥ መሆኑንም ተናግረዋል።

በዳዊት በሪሁን

You might also like
Comments
Loading...