Fana: At a Speed of Life!

የአቢያታ ሀይቅን ከመድረቅ አደጋ ለመታደግ እንደሚሰራ የአካባቢ ደንና የአየር ንብረት ለውጥ ሚኒስቴር አስታወቀ

 

አዲስ አበባ ጥቅምት 1፣ 2011 (ኤፍ.ቢ.ሲ) የአቢያታ ሀይቅን ከመድረቅ አደጋ ለመታደግ እንደሚሰራ የአካባቢ ደንና የአየር ንብረት ለውጥ ሚኒስቴር አስታወቀ።

ሃይቁ ቀደም ሲል ከነበርው የ14 ሜትር ጥልቀት ወደ 2 ሜትር ዝቅ ማለቱ የተገለፀ ሲሆን፥ በአካባቢው ለተፈጥሮ ሃብት ስራ ትኩረት ያለመሰጠቱ፣ ደን መጨፍጨፉ እና ከሶዳ አሽ ፋብሪካ ጉዳይ ጋር በተያያዘ ሃይቁ ለመድረቅ አደጋ ሊጋለጥ መቻሉን የአካባቢ ደንና የአየር ንብረት ለውጥ ሚኒስትር ዶክተር ገመዶ ዳሌ ተናግረዋል።

ለዚሁ ችግር በቅርብ ጊዜ መፍቴሄ እንደሚሰጥ ተስፋቸውን የገለጹት ሚኒስትሩ፥ የሶዳ አሽ ፋብሪካው የአካባቢ ተጽዕኖ ግምገማ እንደሚደረግም ጠቁመዋል።

ፋብሪካው በሃይቁ ላይ ተጽዕኖ እናዳለው ከተረጋገጠም ጉዳዩ ወደ ፍርድ ቤት እንደሚሄድ ያመላከቱት ሚኒስትሩ፥ ፋብሪካው ወደ ሻላ ለመዛወር የነበረው እቅድ ተግባረዊ እንደማይሆን ነው የተናገሩት።

የኦሮሚያ ክልል የባህልና ቱሪዝም ቢሮ በበኩሉ የአቢያታን ሀይቅ ከመድረቅ አደጋ ለመታደግ የሚያስችሉ እርምጃዎች በቅርቡ ተግባራዊ እንደሚሆኑ አስታውቋል።

ተመሳሳይ ችግሮች እንዳይከሰቱ ለማድረግም የኢንቨስትመንት ቦታዎችን በተጠና መንገድ በክላስተር እንደሚሰጡ ነው የገለፀው።

ሃይቁ በአንድ አመት ውስጥ 1 ኪሎ ሜትር ያህል እየሸሸ እንደሚገኝ የተናገሩት ነዋሪዎች፥ ሁኔታው በዚሁ ከቀጠለ በሚቀጥሉት 2 አመታት ውስጥ ሊደርቅ እችንደሚችልም ስጋታቸውን ተናግረዋል።

ለሀይቁ የመድረቅ አደጋ ስጋት ከሆኑት መንስኤዎች መካከል የሶዳ አሽ ፋብሪካ እና የቡልቡላ ወንዝ ወደ ሃይቁ መግባት ማቆሙንም አንስተዋል።

የሶዳ አሽ ፋብሪካ በዓመት እስከ 5 ሚሊየን ኪዩቢክ ሜትር ውሃን ከሃይቁ የሚጠቀም መሆኑን ነዋሪዎቹ ሲናገሩ፥ የሶዳ አሽ ፋብሪካ ስራ አስኪያጅ የሆኑት ዶክተር ብርሃነ መስቀል ፋብሪካው በዓመት 1 ነጥብ7 ሚሊየን ሜትር ኩብ ውሃ ብቻ እንደሚጠቀም ተናግረዋል።

በቢቂላ ቱፋ

You might also like
Comments
Loading...