Fana: At a Speed of Life!

ከኢፌዴሪ የመንግስት ኮሙዩኒኬሽን ጉዳዮች ጽህፈት ቤት የተሰጠ ሳምንታዊ የአቋም መግለጫ

አዲስ አበባ፣ ጥቅምት 2፣2011 (ኤፍ.ቢ.ሲ) የህዝብ አገልጋይ መንግሥታዊ ተቋማትን ለመገንባት እየተደረገ ላለው ጥረት ሁሉም የድርሻውን ሊወጣ ይገባል!

አዲሱን ዓመት በአዲስ የለውጥ መንፈስ በመቀበልና በዋና ዋና የዓመቱ ትኩረቶች ላይ መሠረት ያደረገውን የኢፌዴሪ የመንግስት አቅጣጫዎች በሳምንቱ መጀመሪያ በግልፅ መገንዘብ መቻላችን ግልጽ ነው፡፡

በእርግጥ ለበርካታ ዓመታት በሃገራችን የታዩ ኢ-ፍትሃዊና ኢ-ዴሞክራሲያዊ አሰራሮች መቀጠል እና የኢፌዴሪ መንግሥት የህዝቡን መሰረታዊ የፖለቲካና የኢኮኖሚ ጥያቄዎችን በመመለስ ረገድ የተከተለው ዘገምተኛ አካሄድ በሃገራችን ሰላምና መረጋጋት ብሎም በህልውናዋ ላይ አስከትሎት የነበረውን ከባድ ችግር ሁላችንም የምንገነዘበው ነው።

የችግሩን መሰረታዊ መንስኤዎች እና መፍትሄዎች በጥልቀት በመመመርመር አዳዲስ የለውጥ እርምጃዎችን በመውሰዱ ዛሬ በርካታ ተስፋ ሰጭ ውጤቶችን ማየት የጀመርንበት ጊዜ ላይ እንገኛለን፡፡

አሁንም ቢሆን የሃገራችን ሰላምና ህልውና በአስተማማኝ መልኩ ሊረጋገጥ የሚችለው ሕዝባችን በተደጋጋሚ ሲያነሳቸው የነበሩ የልማት፣ የፍትህ፣ የሰብዓዊ እና ዴሞክራሲ እንዲሁም የመልካም አስተዳደር ጥያቄዎች በአግባቡ ሲመለሱ ብቻ መሆኑን የኢፌዴሪ መንግሥት በጥብቅ ይገነዘባል።

ያጋጠሙንን ችግሮች በዘለቄታው መፍታት የሚያስችሉ እርምጃዎችን መውሰድ ለምርጫ የማይቀርብ ጉዳይ መሆኑንም ከልብ ያምናል።

ከዚህ በመነሳትም የሕዝባችንን ጥያቄዎች ለመፍታት የሚያስችሉ ልዩ ልዩ የለውጥ እርምጃዎችን እየወሰደ ይገኛል።

በተለይ በአሁኑ ወቅት መንግሥት የጀመረውን ሃገራዊ የለውጥ እንቅስቃሴ ተቋማዊ ቅርጽ ለማስያዝ እየተንቀሳቀሰ ያለበት ጊዜ ላይ እንገኛለን።

የተመዘገቡትን የለውጥ ውጤቶች ማስቀጠል ብቻ ሳይሆን ዘመን ተሻጋሪ እንዲሆኑ ለማድረግ የሚያስችሉ ልዩ ልዩ ሃገራዊ የማሻሻያ ሥራዎችን ማካሄዱን አጠናክሮ ቀጥሏል።

እያካሄዳቸው ካሉት በርካታ የማሻሻያ ሥራዎች መካከልም አንዱ የፌዴራል መንግስት መስሪያ ቤቶችን አደረጃጀት እና አሰራር ማሻሻል ሲሆን ሕዝብን በግልጸኝነት እና በቅንነት ማገልገል ዓላማቸው ያደረጉ የመንግሥት ተቋማትን ለመገንባት ጥረት እያደረገ ይገኛል።

ተቋማቱ እርስ በርስ ተናበው እና ተቀናጅተው የሚሰሩ፣ የሕዝብ ሀብትን በቁጠባ የሚጠቀሙ እና ውጤታማ አገልግሎት የሚሰጡ የመንግሥት መስሪያ ቤቶች ይሆኑ ዘንድም አስፈላጊውን የህግ፣ የተቋማት እና የአሰራር ማሻሻያ እርምጃዎችን እየወሰደ ይገኛል።

በመሆኑም የሕዝባችንን ጥያቄዎች በአስተማማኝ መልኩ ለመመለስ የሚያስችሉንን ስትራቴጂያዊ የለውጥ እርምጃወች እየወሰድን ባለንበት በአሁኑ ወቅት፥ ተስፋ ሰጭው ለውጥ ተጠናክሮ ይቀጥል ዘንድ መላው ህዝባችን እና ዜጎቻችን የሚጠበቅባቸውን ሚና እንዲወጡ፣ በተለይም ለሃገራዊ ለውጡ ቀጣይነት መሰረት ለሆነው ሰላማችን እንደወትሮው ሁሉ ዘብ ሆነው እንዲቆሙ መንግስት ጥሪውን ያቀርባል።

You might also like
Comments
Loading...