Fana: At a Speed of Life!

ለጠቅላይ ሚኒስትር ዶ/ር አብይ አህመድ ጥያቄ ያቀረቡ የመከላከያ ሰራዊት አባላት ይቅርታ ጠየቁ

አዲስ አበባ ፣ ጥቅምት 2 ፣ 2011 (ኤፍ ቢ ሲ) ከትናንት በስቲያ ቤተ መንግስት በመሄድ ለጠቅላይ ሚኒስትር ዶክተር አብይ አህመድ ጥያቄ ያቀረቡ የመከላከያ ሰራዊት አባላት ይቅርታ ጠየቁ።

ለጠቅላይ ሚኒስትሩ ጥያቄ ያቀረቡት የ2ኛ ክፍለ ጦር ሬጅመንት አባላት ላለፉት ሁለት ቀናት ከኢፌዴሪ መከላከያ ሚኒስትር አቶ ሞቱማ መቃሳ እና ከኢፌዴሪ ጦር ሃይሎች ጠቅላይ ኤታማዦር ሹም ጀኔራል ሰዓረ መኮንን ጋር ባደረጉት ውይይት ጥያቄያቸው ትክክለኛና ተገቢ ቢሆንም ጥያቄውን ያቀረቡበት መንገድ ግን ህግና ስርዓትን ያከበረ አልነበረም ብለዋል።

የሬጅመንቱ አባላት ጥያቄው ከሀገሪቱና ከመከላከያ ሚኒስቴር ህግና አሰራር ውጭ በመቅረቡ መላውን የሀገሪቱ ህዝብና መንግስትን ይቅርታ ጠይቀዋል።

ከውይይቱ በኋላም ባለ አምስት ነጥብ የአቋም መግለጫ አውጥተዋል።

በአቋም መግለጫቸው ጥያቄዎቻቸው በተቋሙ አሰራር መሰረት በየደረጃው ያለ የእዝ ሰንሰለት ተጠብቆ ሊቀርብ ሲገባው ይህ ባለመሆኑ የስነ ስርዓት ግድፈት መፈፀማቸውን እንደተረዱ ገልፀዋል።

በተቋም ህግ መሰረት ሰራዊቱ ለህገ መንግስቱ ተገዢ መሆንና ሰላማዊ ሰልፍ ያለማድረግ ግዴታ የተጣለበት መሆኑን እያወቁ ከዚህ በተፃረረ መንገድ በመንቀሳቀሳቸው መፀፀታቸውንም አስታውቀዋል።

ከዚህ በመነሳትም አደራና ኃላፊነቱን የሰጠውን የኢትዮጵያ ህዝብ እና መንግስት ይቅርታ በመጠየቅ ከዚህ በኋላ ለህዝብና ለመንግስት የገቡትን ቃል በመፈፀም እንደወትሮው የሀገሪቱ አለኝታ ሆነው ለመቀጠል ቃል ገብተዋል።

 

 

በዳዊት መስፍን

 

 

 

በዳዊት መስፍን

You might also like
Comments
Loading...