Fana: At a Speed of Life!

የውጭ ሀገራት የስራ ስምሪት በዚህ ወር መጨረሻ ወደ ተግባር ሊገባ ነው

አዲስ አበባ፣ መስከረም 2፣ 2011 (ኤፍ.ቢ.ሲ) የውጭ ሀገራት የስራ ስምሪት በዚህ ወር መጨረሻ ወደ ተግባር ሊገባ መሆኑን የሰራተኛና ማህበራዊ ጉዳይ ሚኒስቴር አስታወቀ፡፡

ከዚህ ቀደም ከተቀባይ ሀገራት ጋር ስምምነት መደረሱንም የሰራተኛና ማህበራዊ ጉዳይ ሚኒስትር ዶክተር ሂሩት ወልደማርያም ለፋና ብሮድካስቲንግ ኮርፖሬት ገልጸዋል፡፡

እየጨመረ የመጣውን ህገ ወጥ የሰዎች ዝውውርን ለመግታትም በአዲሱ ዓመት በተጠናከረ ሁኔታ ለመስራት ብሄራዊ ኮሚቴውን የማጠናከር ስራ ይሰራል ብለዋል፡፡

ዶክተር ሂሩት በተቀባይ ሀገራት የሚያስፈልጉ ተወካዮች የማደራጀቱ ስራ መሰራቱንም ጠቅሰዋል፡፡

እንዲሁም ስልጠና የሚሰጡ 69 የሚሆኑ የቴክኒክና ሙያ ተቋማት መዘጋጀታቸውንም ገልጸዋል፡፡

የውጭ ሀገራት የስራ ስምሪት መስፈርትን ያሟሉ 122 ኤጀንሲዎች ዝግጁ የተደረጉ ሲሆን ሌሎች 85 ኤጀንሲዎችም በሂደት ላይ ናቸው ተብሏል፡፡

የኢንሹራንስ ሽፋንም ልዩ ትኩረት የተሰጠው ሲሆን ከዚህ ቀደም ከነበረው በተለየ የኢንሹራንስ ስምምነቱን ተቋማቱ በሚኒስትር መስሪያ ቤቱ በኩል እንዲያደርጉም ተወስኗል፡፡

ጤና ጥበቃ ሚኒስትር ዕውቅና የሰጣቸው 66 የጤና ተቋማትም ለዚሁ አገልግሎት መመረጣቸውን አስታውቀዋል፡፡

አዋጁን ተግባራዊ ለማድረግ የአደረጃጀት ማጠናከር ስራ መሰራቱን የገለጹት ሚኒስትሯ ከሌሎች ተቋማት ጋር በመተባበር ዜጎች የተሻለ ሁኔታ እንዲፈጠርላቸው ይሰራል ብለዋል፡፡

በመጨረሻም ለዚሁ አገልግሎት የሚውል እነማን የትሄዱ ማንተቀበላቸው የሚሉ ጉዳዮችን የሚሰራ ዘመናዊ የመረጃ ማዕከል ግንባታ ተጠናቆ ወደ ተግባር መግባቱንም ዶክተር ሂሩት አስታውቀዋል፡፡

 

ሃብታሙ ተክለስላሴ

You might also like
Comments
Loading...