Fana: At a Speed of Life!

ኤርትራና ጅቡቲ ግንኙነታቸውን ለመቀጠል ተስማሙ

አዲስ አበባ፣ ጳጉሜን 1፣ 2010 (ኤፍ.ቢ.ሲ) ከረጅም አመት መለያየት በኋላ ኤርትራና ጅቡቱ ግንኙነታቸውን ለመቀጠል መስማማታቸው ተገለፀ።

የኢትዮጵያ፣ የኤርትራ እና የሶማሊያ የውጭ ጉዳይ ሚኒስትሮች በዛሬው እለት ወደ ጂቢቱ በማቅናት ከሀገሪ የውጭ ጉዳይ ሚኒስትር እና ፕሬዚዳንት ጋር መወያየታቸውን ተከትሎ ነው ከስምምነት ላይ የተደረሰው።

የኢፌድሪ የውጭ ጉዳይ ሚኒስትር ዶክተር ወርቅነህ ገበየሁ፣ የኤርትራ የውጭ ጉዳይ ሚኒስትር ኦስማን ሳላህ እና የሶማሊያ የውጭ ጉዳይ ሚኒስትር አህመድ ኢሴ ናቸው ወደ ጅቡቲ የተጓዙት።

የኢትዮጵያ፣ የኤርትራ እና የሶማሊያ የውጭ ጉዳይ ሚኒስትሮች በቆይታቸውም ከጂቡቲው አቻቸው የውጭ ጉዳይ ሚኒስትር መሃሙድ አሊ የሱፍ በቀጣናዊ ጉዳዮች ላይ መክረዋል።

በውይይታቸው ወቅትም ጂቡቲ የቀረበላትን የሰላም ሃሰብ በመቀበል ለሰላማዊ ስምምነቱ ፈቃደኛ መሆኗ ነው የተገለጸው።

ይህንን ተከትሎም ከረጅም ዓመት መለያየት በኋላ ኤርትራና ጅቡቱ ግንኙነታቸውን ለመቀጠል እንደተስማሙም ታውቋል።

ከዚህ በተጨማሪም በዛሬው እለት ጂቡቱ የገቡት የኢትዮጵያ፣ የኤርትራ እና የሶማሊያ የውጭ ጉዳይ ሚኒስትሮች ከሀገሪቱ ፕሬዚዳንት ኢስማኤል ኦማር ጊሌ ጋርም ተገናኝተው ተወያይተዋል።

የውጭ ጉዳይ ሚኒስትሮቹ ወደ ጅቡቲ ያቀኑት ትላንት በኢትዮጵያ፣ ኤርትራና ሶማሊያ መካከል የተደረገው የሶስትዮሽ ውይይትን ተከትሎ መሆኑ ይታወሳል።

ጠቅላይ ሚኒስትር ዶክተር አብይ አህመድ የውጭ ጉዳይ ሚኒስትሮች ለታላቅ አላማ ወደ ጅቡቲ መላካቸውን የቻይናና ኤርትራ ጉብኝታቸውን አጠናቀው አዲስ አበባ ሲደርሱ በሰጡት መግለጫ ላይ አስታውቀዋ።

You might also like
Comments
Loading...