Fana: At a Speed of Life!

ቱርክ ጦሯን ወደ ሶሪያ ድንበር ማስጠጋቷ ተነገረ

አዲስ አበባ፣ መስከረም 4፣ 2011 (ኤፍ.ቢ.ሲ) ቱርክ በሶሪያ  ድንበር አካባቢ  ሊከሰት የሚችሉ ጥቃቶችና ከስደተኞች ጋር ተያይዞ ሊከሰቱ የሚችሉ ችግሮችን ለመከላከል ጦሯን ማስጠጋቷ ተገለፀ።

የቱርክ ወታደራዊ ከፍተኛ ተሽከርካሪዎች በሶሪያ ሰሜናዊ ሀማ ግዛት መድረሳቸው ነው የተነገረው።

የቱርክን ወታደሮች የጫኑ  አውሮፕላኖች በሃትያ ግዛት በሚገኝ አውሮፕላን ማረፊያዎች የታዩ ቢሆንም የሶሪያን ድንበር የሚያቋርጡ መሆናቸው አልተረጋገጠም።

በአሁን ወቅት 3 ነጥብ 5 ሚሊየን የሶሪያ ስደተኞች በቱርክ የሚገኙ ሲሆን፥ በሩሲያ መንግስት የሚደገፈው የሀገሪቱ ጦር ኢድልብን ለመቆጣጠር በሚያደርገው ዘመቻ ምክንያት የስደተኛው ቁጥር እንዳይጨምር ስጋት እንዳለ ይነገራል።

ወደ ሶሪያ ድንበር የተጠጋው የቱርክ ጦር የመከላከል እርምጃን እንደሚወስድ ይጠበቃል።

ይህ የሚወሰደው የመከላከል እርምጃ በሶሪያ መንግስት በኢድልብ ግዛት በሚወስደው ጥቃት ሊከሰት የሚችለውን የስደተኞች ፍልሰት ለመቆጣጠር የሚያስችል ነው ተብሏል።

የሶሪያ መንግስት በኢድልብ ግዛት ጥቃት ሊፈጽም ይችላል የሚለው ስጋት ማየሉን ተከትሎ 40 ሺህ ሰዎች አካባቢውን ለቀው ለስደት ተዳርገዋል።

የተባበሩት መንግስታት ድርጅት በበኩሉ በዚህ ጥቃት ምክንያት 900 ሺህ ሰዎች ለስደት ሊዳረጉ እንደሚችል ግምቱን አስቀምጧል።

ምንጭ፥አልጀዚራ

You might also like
Comments
Loading...