Fana: At a Speed of Life!

በአንድ ሳምንት ውስጥ ብቻ በቦሌ አውሮፕላን ማረፊያ በኩል ከሀገር ሊወጣ የነበረ 46 ሺህ ዶላር ተይዟል

አዲስ አበባ፣ ነሃሴ 30፣ 2010 (ኤፍ.ቢ.ሲ) በቦሌ ዓለም አቀፍ አውሮፕላን ማረፊያ ከነሃሴ 19 እስከ 25 ባሉት ቀናት ውስጥ በተደረገ የቁጥጥር ስራ ከሀገር ሊወጣ የነበረ 46 ሺህ የአሜሪካ ዶላር፣ 3 ሺህ ዩሮ፣ 3 ሺህ 500 የአረብ ኤሚሬቶች ድርሃም እና 54 ሺህ ብር ተይዛል።

የኢትዮጵያ ገቢዎች እና ጉምሩክ ባለስልጣን የኮሙዩኒኬሽን ጉዳዮች ዳይሬክተር አቶ ኤፍሬም መኮንን ለፋና ብሮድካስቲንግ ኮርፖሬት እንደተናገሩት፥  ከአዲስ አበባ በተጨማሪ በኢትዮጵያ ገቢዎችና ጉምሩክ ባለስልጣን የባህር ዳር ቅርንጫፍ ውስጥ በሚገኙት መተማና ሰርባ መቆጣጠሪያ ጣቢያዎች 4 ሺህ የሚጠጋ የአሜሪካ ዶላር እና ከ6 ሺህ ዩሮ በላይ ገንዘብ ከሀገር ሊወጣ ሲል ተይዟል።

በእነዚሁ ጣቢያ ወደ ሀገር ሊገባ የነበረ 115 ሺህ ብር የሚያወጣ የኮንትሮባንድ እቃ ተይዟል።

ሃዋሳ እና ሞያሌን ጨምሮ በኮንሶ፣ አቦስቶ እና ዲላ መቆጣጠሪያ ጣቢያዎች እና ኬላዎች ላይ 1 ነጥብ 3 ሚሊየን ብር የሚገመት የተለያዩ የኮንትሮባንድ እቃዎች ተይዘዋል።

ሚሌ ላይ ከነሃሴ 19 እስከ 29 ድረስ በተከናወነ የቁጥጥር ስራ በአዋሽ፣ አርበርከቴ፣ አዳይቱና አልባሽር የመቆጣጠሪያ ጣቢያዎች ላይ 5 ነጥብ 9 ሚሊየን ብር የሚያወጡ  ሺሻ፣ መድሃኒት፣ ሲጋራ እና የተለያዩ የመኪና መለዋወጫዎች ወደ መሃል አካባቢዎች ሊገቡ ሲሉ ተይዘዋል።

በጅግጅጋ በተመሳሳይ 466 ሺህ  ብር የሚያወጡ የኮንትሮባንድ እቃዎች በእነዚህ ቀናት ውስጥ በቁጥጥር ስር ውለዋል።

 

በታሪክ አዱኛ

You might also like
Comments
Loading...