Fana: At a Speed of Life!

ለምለም ፉድ ኮምፕሌክስ ኩባንያ ጊዜ ያለፈባቸዉን ምርቶችን በድጋሜ ሲያመርት በመገኘቱ  እርምጃ ተወሰደበት

አዲስ አበባ ፣ መስከረም 14፣2011( ኤፍ ቢ ሲ) ለምለም ፉድ ኮምፕሌክስ ኩባንያ ጊዜ ያለፈባቸዉን ምርቶችን በድጋሜ ሲያመርት በመገኘቱ  እርምጃ ተወሰደበት

ድርጅቱ የሚያመርታቸዉን ቪቫ (Viva) ፓስታና ቪታ (Vita) ማካሮኒ ጊዜ ያለፈባቸዉ ምርቶች ከጤናማ ምርቶች ጋር በመቀላቀል ሲያመርት በመገኘቱ፥ ምርቶቹን እንዳያመርትና ለገበያ እንዳያቀርብ ተደርጓል።

የኢትዮጵያ የምግብ፣ መድኃኒትና ጤና ክብካቤ አስተዳደር ቁጥጥር ባለሥልጣን ለምለም ፉድ ኮምፕሌክስ የተባለ የፓስታና ማካሮኒ አምራች ኩባንያን ምርቶቹን እንዳያመርትና ለገበያ እንዳያቀርብ ማገዱን አስታውቋል።

ባለሥልጣኑ ባወጣው መግለጫ የኩባንያውን ፋብሪካ ያሸገ ሲሆን፥ ፋብሪካው ጊዜያቸው ያለፈባቸውና የተበላሹ የማካሮኒና የፓስታ ምርቶችን ዳግም በመፍጨት፥ ከጤነኛው ጋር በመቀላቀል እያመረተ ለገበያ ያቀርብ ነበር ብሏል።

ይህንን ድርጊት ያወቀው ባለሥልጣኑ ፋብሪካውን ከማሸጉ በተጨማሪ በቀጣይ ድርጅቱን ለህግ የማቅረብ ስራ እንደሚሰራ የባለሥልጣኑ የኮሙዩኒኬሽን ዳይሬክተር አቶ ሳምሶን አብርሃ  ተናግረዋል።

ማጣራቱ በሚገባ እስከሚከናወን ግን ሸማቾች በምንም ዓይነት መንገድ ምርቶቹን እንዳይጠቀሙ፥ገበያ ውስጥም ምርቶቹ ለሽያጭ እንዳይቀርቡ አሳስቧል።

ህብረተሰቡም ምርቶቹን ሲሸጥ ማንኛውም ቸርቻሪም ሆነ ድርጅት ሲገኝ በአካባቢው ለሚገኙ ተቆጣጣሪ አካላት ወይም በባለስጣኑ ነፃ የስልክ መስመር 84 82 በመደወል ጥቆማ እንዲሰጥ ጥሪ ቀርቧል።

 

ምንጭ፦ ኢዜአ

You might also like
Comments
Loading...