Fana: At a Speed of Life!

2010 ኢትዮጵያ ውጤታማ የዲፕሎማሲ ስራ ያከናወነችበት ዓመት ነው – የውጭ ጉዳይ ሚኒስቴር

አዲስ አበባ፣ ነሃሴ 14፣ 2010 (ኤፍ.ቢ.ሲ) በርካታ የጂኦፖለቲካ መሳሳቦች በተፈጠሩበት የአፍሪካ ቀንድ አካባቢ ሊጠናቀቅ ጥቂት ሳምንታት ብቻ በቀሩት የ2010 ዓ.ም ኢትዮጵያ ውጤታማ የዲፕሎማሲ ስራ ያከናወነች መሆኑን የውጭ ጉዳይ ሚኒስቴር ገለጸ።

በተለይም ባለፉት አራት ወራት ውስጥ ኢትዮጵያ በርካታ አዳዲስ ሁነቶችን ያስተናአገደችና የአመራር ለውጥ የተደረገ መሆኑን የውጭ ጉዳይ ሚንስትር ቃል አቀባይ አቶ መለስ አለም ለፋና ብሮድ ካስቲንግ ኮርፖሬት ተናግረዋል።

በዚሁ የአመራር ለውጥ ወደ ስልጣን የመጡት ጠቅላይ ሚኒስትር ዶክተር አብይ አህመድ በምጣኔ ሀብት፣ በፖለቲካውና በውጭ ጉዳይ ፖሊሲዎች ዙርያ አዳዲስ ሁነቶች መስተናገዳቸውንም ቃል አቀባዩ ገልጸዋል።

በዚህም ጠቅላይ ሚኒስትር ዶክተር አብይ ከሀገር የውስጥና በጎረቤት ሀገራት ጋር ያደረጓቸው ጉብኝቶችና የተደረሱባቸው ስምምነቶች የዲፕሎማሲ ስኬት እንዲመዘገብ አድርገዋል ብለዋል።

ከሁለት አስርት ዓመታት በላይ የተቋርጦ የነበረው የኢትዮ ኤርትራ ሰላማዊ የዲፕሎማሲ ግንኙነት ከስኬቶች መካከል በዓርያነት የሚጠቀስ መሆኑ ነው የተገለጸው።

የሁለቱ ሀገራት ዲፕሎማሲ ግንኙነት ጉዳይ ብዙ የኢትዮጵያ አጋሮች ተስፋ የቆረጡበት ጉዳይ ሆኖ የነበር መሆኑንም አቶ መለስ አስታውሰዋል።

ይሁን እንጂ ከዛሬ አራት ወራት በፊት ሊታሰቡ የማይችሉ የሁለቱ ሀገራት አየር መንገዶ በረራ፣ የስልክ ግንኙነት ከመጀመር ባለፈ የወደብ አገልግሎት ለመጠቀም ስምምነት ላይ ደርሰው የመሰረተ ልማት እድሳት ላይ መሆናቸውን ነው የገለጹት።

በዚህም የሁለቱ ሀገራት ዲፕሎማሲያው ግንኙነት የስጋት ደመና ላንዣበበበት ምስራቅ አፍሪካ አካባቢ አዲስ ብስራት ሆኖ ብቅ ብሏል ሲሉም አስረድተዋል።

የሁለቱ ሀጋራት የሰላም ግንኙነት በቀጣናው አወንታዊ ተፅእኖ የሚፈጥር ሲሆን፥ የከፋ ግጭት ውስጥ ለገባችውን የደቡብ ሱዳን ጉዳይ ተስፋ ሰጭ መሆኑን ነው የገለጹት።

የወቅቱ የምስራቅ አፍሪካ የልማት በይነ መንግስታት ኢጋድ ሊቀመንበር ጠቅላይ ሚኒስትር ዶክተር አብይ አህመድ ለሁለት ዓመታት ፊት ለፊት መገናኛትያልቻሉትን ቀዳሚ የጁባ ፖለቲከኞች፣ ፕሬዚዳንት ሳልቫ ኪር ማያርዲያትና ዋና ተቃዋሚቸውን ዶክተር ሪያክ ማቻርን በአዲስ አበባ ፊት ለፊት እንዲገናኙ ለሰላም እጃቸውን እንዲዘረጉ አደርገዋል።

አዲስ አበባ ከአስመራና ከጁባ ከዲፕሎማሲ ተሳትፎ ባለፈ ከሱዳን ከኬንያና ከጅቡቲ ጋርም ያላትን ግንኙነት ይብለጥ የሚያጠናክሩ ስምምነቶችን በዚህ ዓመት መፈራረሟንም ነው ቃል አቀባዩ የተናገሩት።

የዲያስፖራ ፖለቲካ በሀገር ውስጥ ካለው ነባራዊ ሁኔታ ጋር ቀጥታ የሚገናኝ ሲሆን፣ በሀገር ውስጥ የመጡ ለውጦች ባህር ማዶ ተሻግረው በኢትዮጵያዊያንና ትውልደ ኢትዮጵያዊያን ልብ ውስጠም አዲስ ተስፋ እንዲሰንቅ የማድረግ ስራ በዚህ ዓመት መከናዎኑን ነው አቶ መልስ ያመላከቱት።

አሁን ላይ የተፈጠረው ሀገራዊ የአንድነት መንፈስም ተጠናክሮ ከቀጠለ በቀጣዩን ዓመትም የዲፕሎማሲ ስኬት እንዲመዘገብበት የሚረዳ ነው ብለዋል።

በስላባት ማናዬ

You might also like
Comments
Loading...