Fana: At a Speed of Life!

1 ሺህ 439ኛው የኢድ አል አድሃ በዓል ተከበረ

1 ሺ 439ኛው የአረፋ በዓል

አዲስ አበባ ፣ ነሐሴ 15 ፣ 2010 (ኤፍ ቢ ሲ) 1 ሺህ 439ኛው የኢድ አል አድሃ (አረፋ) በዓል በመላው ሀገሪቱ በታላቅ ድምቀት ተከብሮ ውሏል።

በተለይም በአዲስ አበባ ህዝበ ሙስሊሙ በዓሉን በስግደትና በፀሎት በአዲስ አበባ ስታዲየም ከማለዳ ጀምሮ በመሰብሰብ አክብሮታል።

በተጨማሪ በዓሉ በባህርዳር፣መቐለ፣ አደማ፣ ድሬደዋ፣ ሀረር ጨምሮ በበርካታ የሀገሪቱ ክፍሎች በስግደት ስነ ስርዓት እና ሌሎች ሀይማኖታዊ ክንውኖች ተከብሮ ውሏል።

የኢድ አል አድሃ አረፋ በዓል አላህ የነብዩ ኢብራሂምን ፍቅርና እምነት ለመፈተን ልጃቸውን ለመስዋዕትነት እንዲያቀርቡ ያዘዘበትን ዕለት ለማሰብ የሚከበር ሃይማኖታዊ በዓል ነው።

ነብዩ ኢብራሂም ለፈጣሪ የነበራቸው እምነታትና ፍቅር ፍፁም ነበርና የሚወዱት ልጃቸው እስማኤልን ይዘው ወደ መሰዊያው ያቀናሉ፤ ታዛዥነታቸውን የተረዳው ፈጣሪም በምትኩ ሙክት በግ አዘጋጀላቸው።

እርሳቸውም በጉን በማረድ ለፈጣሪ መስዋዕት አቅርበዋል፤ ከዚያን ጊዜ ጀምሮም እለቱ የእርድ ወይም የኡዱህያ ቀን ተብሎ ይከበራል።

ይህንኑ ታሪክ ለመዘከርም በዓሉ የመስዋዕትነት በዓል ተብሎ እንደሚጠራ የእምነቱ ሊቃውንት ያስረዳሉ፤ የእምነቱ ተከታዮችም የነብዩ መሃመድን ፈለግ ተከትለው በዚሁ እለት እርድ ይፈጽማሉ።

በኢትዮጵያ እስልምና ጉዳዮች ጠቅላይ ምክር ቤት የኢትዮጵያ ኡለማ፣ ዳዕዋና ፈትዋ ምክትል ፕሬዚዳንት ተቀዳሚ ሙፍቲህ ሃጅ ኡመር ኢድሪስ የእንኳን አደረሳችሁ መልዕክታቸውን አስተላልፈው፥ በዓሉን የተቸገሩትን በማሰብና በማካፈል በፍቅር ማሳለፍ ይገባል ብለዋል።

መላው ምዕመንም በዓሉን ሲያከብር እምነቱ በሚያዘው መሰረት አቅመ ደካሞችን በማሰብና ያለውን በማካፈል መሆን እንዳለበትም መልዕክታቸውን አስተላልፈዋል።

በአሁኑ ወቅት በአንዳንድ የሃገሪቱ አካባቢዎች እየተፈጸሙ ያሉ ህገ ወጥና ኢ- ሰብዓዊ ድርጊቶችን ምክር ቤቱ በድጋሚ እንደሚያወግዝ ገልጸው፥ ህዝበ ሙስሊሙ ከሌሎች እምነት ተከታዮች ጋር በመሆን ለሃገር ሰላም ዘብ ሊቆም ይገባልም ነው ያሉት።

ህብረተሰቡም ጠቅላይ ሚኒስትር ዶክተር ዐቢይ አህመድ የጀመሩትን የለውጥ ጉዞ በተግባር ሊደግፍ እንደሚገባም አስረድተዋል።

 

በአወል አበራ

You might also like
Comments
Loading...