Fana: At a Speed of Life!

ፕሬዚዳንት ዶ/ር ሙላቱ ተሾመ ከኦ.ኤም.ኤን ዋና ዳይሬክተር አቶ ጃዋር መሀመድ ጋር ተወያዩ

ፕሬዚዳንት ዶ/ር ሙላቱ ተሾመና አቶ ጃዋር መሀመድ

አዲስ አበባ፣ ነሃሴ 1፣ 2010 (ኤፍ.ቢ.ሲ) የኢፌዴሪ ፕሬዚዳንት ዶክተር ሙላቱ ተሾመ የኦሮሚያ ሚዲያ ኔትዎርክ የስራ ኃላፊዎችን ዛሬ በጽሕፈት ቤታቸው ተቀብለው አነጋገሩ።

በውይይታቸውም ፕሬዚዳንት ዶ/ር ሙላቱ፥ ዲያስፖራዎችን በማስተባበር ወጣቱ በሀገር ግንባታ ላይ በንቃት እንዲሳተፍ በመንግስት ድጋፍ እንደሚደረግ ገልፀዋል።

ፕሬዝዳንቱ የኦሮሚያ ሚዲያ ኔትዎርክ የስራ ሃላፊዎች ላመጡት ቀናኢ አስተሳሰብ ምስጋና አቅርበው፤ ለዚህ መሰሉ ተግባራትም ሰፊ የመንግስት ድጋፍ እንደሚኖር ነው የገለጹት።

በመሆኑም ኃላፊዎቹ የጀመሩትን ወጣቶችን አስተባብሮ ለስራ ማነሳሳትና የስራ አጥነትን የመቀነስ እንቅስቃሴ በፍጥነት መተግበር እንዳለባችው መጠቆማቸውን የፕሬዘዳንት ጽህፈት ቤት የፕሮቶኮልና ኮሙኒኬሽን ዳይሬክተር አቶ አሸብር ጌትነት ገልጸዋል።

የኦሮሚያ ሚዲያ ኔትዎርክ ዋና ዳይሬክተር አቶ ጀዋር መሐመድ በበኩላቸው፥ በተለያዩ ሀገሮች ያካበቱትን ልምድ ለወጣቶች በማካፈል በኢትዮጵያ አንድነትና ዘላቂ ሰላም ላይ የበኩላቸውን እንደሚወጡ ገልፀዋል።

የፖለቲካ ፓርቲዎችን ማማከር ካልሆነ በቀር በኢትዮጰያ ፖለቲካ እንደማይሳተፉ የገለጹት አቶ ጀዋር፥ ሙሉ ትኩረታቸው ሙያን መሰረት ያደረገ የሚዲያ ስራ ላይ መሆኑንም ገልጸዋል።

የኢትዮጵያ ሱማሌ ክልልን ጨምሮ በተለያዩ አካባቢዎች የሚከሰቱ ግጭቶች የአመራሩ ድክመት እንጂ በህዝቡ መካከል ጥላቻ እንደሌለም ጠቁመዋል።

በመሆኑም አመራሩ በሚፈጥራቸው ዘርን መሰረት ያደረገ ክፍፍል የሚፈጠሩ ግጭቶች እንዲቆሙና በሀገሪቷ ሰላም አንድነትና እድገት እንዲሰፍን አበክረን እንሰራለን ብለዋል።

ምንጭ፦ ኢዜአ

You might also like
Comments
Loading...