Fana: At a Speed of Life!

የ2017/18 የአውሮፓ ምርጥ እግር ኳስ ተጫዋች የመጨረሻ እጩዎች ይፋ ሆኑ

የአውሮፓ ምርጥ እግር ኳስ ተጫዋች

አዲስ አበባ ፣ ነሐሴ 14 ፣ 2010 (ኤፍ ቢ ሲ) የ2017/18 የአውሮፓ ምርጥ እግር ኳስ ተጫዋች የመጨረሻ እጩዎች ይፋ ሆኑ።

የአውሮፓ እግር ኳስ ማህበር በአመቱ ምርጥ ያላቸውን ተጫዋቾች የመጨረሻ እጩዎችን ዛሬ ይፋ አድርጓል።

ማህበሩ ለአመቱ ምርጥ ተጫዋችነት ምርጫ 10 ተጫዋቾችን ይፋ ማድረጉ የሚታወስ ሲሆን፥ በዛሬው እለትም የመጨረሻ እጩዎችን አሳውቋል።

በዚህም መሰረት ፖርቹጋላዊው ክርስቲያኖ ሮናልዶ፣ ግብጻዊው ሞሃመድ ሳላህ እና ክሮሺያዊው ሉካ ሞድሪች የመጨረሻ እጩዎች ሆነው ቀርበዋል።

የምርጫው አሸናፊ የፊታችን ነሐሴ 24 በፈረንሳይ ሞናኮ የሚታወቅ ይሆናል።

ሮናልዶ በቻምፒየንስ ሊጉ በአሸናፊነትና በኮከብ ጎል አስቆጣሪነት ሲጨርስ በአለም ዋንጫው ብዙም ርቀት መጓዝ አልቻለም ነበር።

በአንጻሩ የቀድሞው የቡድን አጋሩ ሉካ ሞድሪች ለሪያል ማድሪድ የቻምፒየንስ ሊግ ስኬት መሃል ሜዳውን በመምራት ትልቅ ሚና ተጫውቷል።

ከዚህ ባለፈም ከእነ ዳቮር ሱከር እና ቦባን በኋላ ሳይታሰብ ለስኬት የቀረብ በመሰለው ቡድን በዓለም ዋንጫው ስኬታማ ጉዞ አድርጓል።

በውድድሩም መሃል ሜዳውን በብቃት እየመራ እስከ ፍጻሜው ቢጓዝም በፍጻሜው በፈረንሳይ ተሸንፈው ባለ ድል መሆን አልቻሉም።

ግብጻዊው ሞሃመድ ሳላህ በበኩሉ ሃገሩን ከጣሊያኑ የዓለም ዋንጫ በኋላ ለውድድሩ በማድረስ ትልቁን ድርሻ ይወስዳል።

ከዚህ ባለፈም በእንግሊዝ ፕሪሚየር ሊግ ስኬታማ አመት አሳልፏል።

በአውሮፓ ቻምፒየንስ ሊግም ከቡድን አጋሮቹ ጋር በመሆን ቡድኑን ለፍጻሜ ቢያበቃም፥ በፍጻሜው በማድሪዱ ተከላካይ ሰርጅዮ ራሞስ በተሰራበት ጥፋት ጨዋታውን ለማቋረጥ ተገዷል።

 

You might also like
Comments
Loading...