Fana: At a Speed of Life!

የኢትዮጵያ እስልምና ጉዳዮች ጠቅላይ ምክር ቤት ሰሞኑን በኢትዮጵያ ሶማሌ ክልል የተከሰተውን ጥቃት አወገዘ

የኢትዮጵያ እስልምና ጉዳዮች ጠቅላይ ምክር ቤት በኢትዮጵያ ሶማሌ ክልል

አዲስ አበባ፣ ነሃሴ 1፣ 2010 (ኤፍ.ቢ.ሲ) የኢትዮጵያ እስልምና ጉዳዮች ጠቅላይ ምክር ቤት ሰሞኑን በኢትዮጵያ ሶማሌ ክልል የተከሰተውን ጥቃት እንደሚያወግዝ አስታወቀ።

ምክር ቤቱ ዛሬ ባወጣው መግለጫ፥ ሰሞኑን በኢትዮጵያ ሶማሌ ከልል የተከሰተው ሁከትና ብጥብጥ የአገራችንን ህዝብ አብሮ የመኖር የጋራ ባህልና እሴት የሚሸረሸር ሆኖ ማግኘቱን ገልጿል።

ይህ ድርጊትም የመላው ኢትዮጵያን ሙስሊም ክርስቲያኑ ያሳዘነ ተግባር መሆኑንም ምክር ቤቱ አስታውቋል።

በጅግጅጋ አካባቢ የተፈፀመው ቤተ እምነቶችን የማቃጠል ተግባር የእስልምና አስተምሮት የማይገልፀው መሆኑን የገለፀው ምክር ቤቱ፥ አብዝቶ የሚቃወምና የሚያወግዘው ተግባር መሆኑን ገልጿል።

ምክር ቤቱ አክሎም በጅግጅጋ ከተማ በተፈፀመ አስፀያፊ ዘርን መሠረት ያደረገ ጥቃት የስው ሕይወትና ንብረት መውደሙን በመግለጽ፤ ተግባሩን እንደሚያወግዝም በመግለጫው አስታውቋል።

ይህ ተግባር ከእስልምና ሀይማኖት ጋር ምንም አይነት መሠረትና ተቀባይነት የሌለው የስው ልጆችን ክብር የሚያዋረድ ስብአዊነትን የሚጋፋ መሆኑንም ምክር ቤቱ ገልጿል።

በተለይም አሁን ሀገሪቱ የጀመረችውን የለውጥ ተሰፋ ለማደናቀፍ እንቅፋት እየተፈጠረ መሆኑን ህዝበ ሙስሊሙ ይገነዘባል ብሏል ምክር ቤቱ

በመሆኑም መላው ኢተዮጵያዊን አንድ በሚያደርጉ አገራዊ ጉዳዮች ላይ በመተባበርና በመተጋገዝ፤ ብጥብጥና ሁከት ፈጣሪ አካላትን በመለየት መጥፎ ተግባራትን መፀየፍና መታገል እንደሚገባም አሳስቧል።

ድረጊቱን በእጅጉ እንደሚያወግዝ ያስታወቀው የኢትዮጵያ እስልምና ጉዳዮች ጠቅላይ ምክር ቤት፥ የቀድሞው ሰላም ይመለስ ዘንድ ህዝበ ሙስሊሙ ዱዓ (ፀሎት) እንዲያደረግም ጠይቋል።

You might also like
Comments
Loading...