Fana: At a Speed of Life!

የኢትዮጵያ መንግስትና የኦሮሞ ነጻነት ግንባር (ኦነግ) የእርቅ ስምምነት ተፈራረሙ

የኢትዮጵያ መንግስትና ኦነግ

አዲስ አበባ፣ ነሀሴ 1፣ 2010 (ኤፍ.ቢ.ሲ) የኢትዮጵያ ፌዴራላዊ ዴሞክራሲያዊ ሪፐብሊክ መንግስት እና የኦሮሞ ነጻነት ግንባር (ኦነግ) የእርቅ ስምምነት በአስመራ ተፈራረሙ።

በኦሮሚያ ብሄራዊ ክልላዊ መንግስት ፕሬዚዳንት አቶ ለማ መገርሳና በኢፌዴሪ የውጪ ጉዳይ ሚኒስትር ዶ/ር ወርቅነህ ገበየሁ የተመራ የኢትዮጵያ መንግስት ልዑክ ትናንት ወደ አስመራ በማቅናት ከኦሮሞ ነጻነት ግንባር (ኦነግ) ሊቀ-መንበር በአቶ ዳውድ ኢብሳ ከሚመራውና ልዑክ ጋር የእርቅ ውይይት አካሂዷል።

ውይይታቸውንም በመተማመን በማካሄድ በተለያዩ ጉዳዮች ላይ ስምምነት ላይ መድረሳቸውን አስታውቀዋል።

በዚህም ኦነግ ለበርካታ ዓመታት ሲያካሄድ የቆየውን የትጥቅ ትግል በማቆም በሀገሪቱ በተፈጠረው መልካም አጋጣሚ ትግሉን በሰላማዊ መንገድ ለመቀጠል ከስምምነት ተደርሷል።

ስምምነት የተደረሰባቸውን ጉዳዮች ስራ ተግባራዊ ለማድረግና ምርመራና ጊዜ የሚጠይቁትን በሂደት ከፍጻሜ የሚያደርስ ኮሚቴ በአስቸኳይ ለማቋቋም መግባባት ላይ ደርሰዋል።

እንዲሁም በሚቀጥሉት ሁለት እና ሶስት ቀናቶች ዉስጥ አንድ የኦነግ የልዑካን ቡድን ወደ ኢትዮጵያ እንደሚጓዝ የኦነግ ቃል አቀባይ አቶ ቶሌራ አዳባ መግለፃቸውን ዶይቼቬሌ ዘግቧል።

በቅርቡ የኢፌዴሪ የህዝብ ተወካዮች ምክር ቤት ኦነግ፣ ኦብነግና ግንቦት 7 ከሽብርተኝነት ዝርዝር  መሰረዙ ይታወሳል።

በተመሳሳይ ጠቅላይ ሚኒስትር ዶክተር አብይ አህመድ ያቀረቡትን የሰላም ጥሪ ተከትሎ፥ ከዚህ ቀደም የኦሮሞ ዴሞክራሲያዊ ግንባር (ኦዴግ) እና የኦሮሚያ ነጻነትና አንድነት ግንባር ልዑካን አዲስ አበባ መግባታቸው የሚታወስ ነው።

You might also like
Comments
Loading...