Fana: At a Speed of Life!

በምህረት አዋጁ እስካሁን 185 ሰዎች ተጠቃሚ ሆነዋል

የምህረት አዋጁ ተጠቃሚዎች

አዲስ አበባ ፣ ነሐሴ 25 ፣ 2010 (ኤፍ ቢ ሲ) ከሃምሌ 13 ቀን ጀምሮ ለስድስት ወራት በሚቆየው የምህረት አዋጅ መሰረት በ1 ወር ከ10 ቀን ውስጥ 185 ሰዎች የምህረቱ ተጠቃሚ መሆናቸውን ጠቅላይ አቃቤ ህግ ገለጸ።

ሀገራዊ አንድነትንና መግባባትን ያጠናክራል በሚል በህዝብ ተወካዮች ምክር ቤት የታወጀው የምህረት አዋጅ፥ ከሃምሌ 13 ቀን 2010 ዓ.ም ጀምሮ በፌደራል ጠቅላይ አቃቤ ህግ፣ በፌደራል ፖሊስ፣ በሀገር መከላከያ ሰራዊት እና በክልል ፍትህ ቢሮዎች አስፈጻሚነት እየተተገበረ ይገኛል።

ይህ አዋጅ የሚመለከታቸው በአዋጁ የተጠቀሱትን ወንጀሎች ፈጽመዋል ተብለው፥ በቁጥጥር ስር ውለው በምርመራ ላይ ያሉትን እና ምርመራቸው ተጠናቆ በማረሚያ ቤት ያሉትን የሚመለከት ነው።

በተቀመጠው የጊዜ ገደብ መሰረትም ከሃምሌ 13 ቀን 2010 ዓ.ም ጀምሮ ለስድስት ወራት ያህል በወጣው የምህረት አዋጅ ላይ የተጠቀሱትን የወንጀል አይነቶች የፈጸሙ ሰዎች፥ በአካል፣ በወኪል እና በፌደራል ጠቅላይ አቃቤ ህግ ድረ ገጽ  በመመዝገብ የምህረቱ ተጠቃሚ መሆን ጀምረዋል።

በፌደራል ጠቅላይ አቃቤ ህግ የይቅርታ እና ምህረት ቦርድ ጽህፈት ቤት ሀላፊ አቶ ዘለቀ ዳለሎ ከፋና ብሮድካስቲንግ ኮርፖሬት ጋር ባደረጉት ቆይታ እንዳሉት፥ የምህረት አዋጁ ይመለከተኛል የሚሉ ሰዎች እየመጡ በመመዝገብ የማረጋገጫ ሰርተፍኬታቸውን እየወሰዱ ነው።

በፌደራል ጠቅላይ አቃቤ ህግ ብቻም የምህረት አዋጁ መተግበር ከጀመረበት ሃምሌ 13 ቀን 2010 ዓ.ም ጀምሮ እስከ ነሃሴ 23 ቀን 2010 ዓ.ም ባለው ጊዜ ውስጥ 185 ሰዎች የምህረቱ ተጠቃሚ ሆነዋል።

ከእነዚህ ውስጥ ለ54ቱ ሰርተፍኬት የተሰጠ ሲሆን፥ ለ36ቱ ደግሞ እየተዘጋጀላቸው መሆኑም አቶ ዘለቀ ይናገራሉ።

ከዚህ በተጨማሪም በድረ ገፅ ሰዎች እየተመዘገቡ ባሉበት የምህረቱ ተጠቃሚ ቢሆኑም፥ የማረጋገጫ ሰርተፍኬት ለማግኘት ግን በአካል መምጣትና ወኪል መላክ እንደሚጠበቅባቸው ገልጸዋል።

አሁን ላይ ከመጀመሪያዎቹ ጊዜያት በተሻለ ሰዎች እየመጡ እየተመዘገቡ ነው ያሉት አቶ ዘለቀ፥ የሚመለከታቸው ሰዎችም ጊዜው ከመጠናቀቁ በፊት የምህረት ተጠቃሚነታቸውን እንዲያረጋግጡ መልዕክት አስተላልፈዋል።

በሌላ በኩል የክልል ፍትህ ቢሮዎች ይህን የምህረት አዋጅ እያስፈጸሙ ሲሆን፥ የኦሮሚያ ክልል ፍትህ ቢሮ ምክትል ሃላፊ አቶ አሽማዊ ሰይፉ በቀጥታ ወደ ክልሉ ፍትህ ቢሮ መጥተው የሚመዘገቡ ሰዎች ቁጥር ዝቅተኛ መሆኑን ይናገራሉ።

እንደ እርሳቸው ገለጻ ተመዝግበው የማረጋገጫ ሰርተፍኬት እየጠበቁ ያሉ 46 ሰዎች ፣ በማረሚያ ቤት የነበሩ እና ምርመራ የተቋረጠላቸው ሁለት ሰዎች እንዲሁም አንድ ሰው ደግሞ በቀጥታ በመምጣት ተመዝግበዋል።

የፌደራል ፖሊስ ኮሚሽን አወቃቀሩ አመች ባለመሆኑ እስካሁን ምዝገባ ሳይጀምር መቆየቱን፥ በኮሚሽኑ የህግ ጉዳይ ምክር አገልግሎት ዳይሬክተር ኮማንደር ፋሲል አሻግሬ ተናግረዋል።

በዚህ መሰረት የከዱ ወይም የኮበለሉ አባላቱ ወደ ፌደራል መምጣት ሳያስፈልጋቸው ባሉበት ክልል ፍትህ ቢሮ አማካኝነት መመዝገብ እና አገልግሎቱን ማግኘት ይችላሉ ብለዋል።

ምህረቱ ተግባራዊ መሆን ከጀመረ ከአንድ ወር በላይ በማስቆጠሩም ይህን ጊዜ ለማካካስ፥ ስድስት ወሩ በክልል ፍትህ ቢሮዎች እንዲገለገሉ ከተወሰነበት ጊዜ ጀምሮ ይቆጠራልም ነው ያሉት።

 

 

በትዕግስት አብርሃም

 

 

You might also like
Comments
Loading...