Fana: At a Speed of Life!

ጠቅላይ ሚኒስትር ዶ/ር አብይ በነገው ዕለት ወደ አሜሪካ ያቀናሉ:

አዲስ አበባ፣ ሐምሌ 18፣ 2010 (ኤፍ.ቢ.ሲ) የኢፌዴሪ ጠቅላይ ሚኒስትር ዶክተር አብይ አህመድ በነገው ዕለት ወደ አሜሪካ ያቀናሉ፡፡

ጠቅላይ ሚኒስትሩ በሎስአንጀለስና በዋሽንግተን ዲሲ በሚኖራቸው ቆይታ ከኢትዮጵያውያንኑ ከትውልደ ኢትዮጵያውያን ጋር ይወያያሉ ተብሎ ይጠበቃል፡፡

ጠቅላይ ሚኒስትሩ ከነገ ጀምሮ እስከ ሐምሌ 24 ድረስ ነው በአሜሪካ ቆይታ ያደርጋሉ የተባለው፡፡

የጠቅላይ ሚኒስትር ጉዞ የመንግስት ለመንግስት ግንኙነት መሰረት ያደረገ ሳይሆን በቀጥታ በዚያ የሚገኙ ኢትዮጵያውያንና ትውልደ ኢትዮጵያውያን አግኝተው ማወያየትን ዋና ዓላማው ያደረገ መሆኑን የኢፌዴሪ የውጭ ጉዳይ ሚኒስቴር ማስታወቁ ይታወሳል።

“ግንቡን እናፍርስ ድልድዩንም እንገንባ” በሚል መሪ ቃል የሚያደርጉት ጉዞ በአጠቃላይ በአሜሪካ የሚገኙ ኢትዮጵያውያንና ትውልደ ኢትዮጵያውያን በሀገራቸው እየተካሄደ ላለው ሁለንተናዊ ለውጥ አካል ሆነው ለሀገራቸው ልማትና እድገት እንዲሁም ዴሞክራሲያዊ ስርዓት ግንባታ ተሳታፊ ሆነው ራሳቸውን ጠቅመው ሀገራቸውን እንዲጠቅሙ በማለም የሚካሄድ ነው።

ጠቅላይ ሚኒስትሩ ሀምሌ 21 በዋሽንግተን ዲሲ እና ሀምሌ 22 ሎስ አንጀለስ ከተማዎች ሁሉም ወገን የሚሳተፉባቸው ጉባዔዎች እንደሚደረጉ በመግለጫው ተጠቁማል።

ለውይይት እነዚህ ከተሞች የተመረጡትም በምስራቁና በምዕራቡ የአሜሪካ ግዛቶች የሚገኙ ኢትዮጵያውያንን ወደ አቅራቢያ ማዕከል ለማሰባሰብ እንዲመች ተብሎ መሆኑንም ነው የተመለከተው።

በተለያዩ ግዛቶች የሚገኙ ኢትዮጵያውያንና ትውልደ ኢትዮጵያውያን ጠቅላይ ሚኒስትር ዶክተር አብይን በየአከባቢያቸው ለመቀበል ፍላጎት ያሳዩ ቢሆንም ካለው ጊዜ አንፃር ግን ሁሉንም ለማዳረስ አዳጋች በመሆኑ ሁለቱ ከተሞች መመረጣቸው ተገልጿል።

በመሆኑም በመካከለኛው አሜሪካ የሚገኙ ወገኖች በሚያመቻቸው ሁኔታ እንዲሳተፉ ነው የተጋበዙት።

በእነዚህ ህዝባዊ ጉባዔዎች ላይ የፖለቲካ አመለካከት፣ የሀይማኖት፣ ብሄር፣ ወዘተ ሳይለያያቸው ሁሉም ኢትዮጵያውያን እና ትውልደ ኢትዮጵያውያን እንዲሳተፉም ጥሪ ቀርቧል።

ጠቅላይ ሚኒስትሩ በጉብኝታቸው አቡነ ሞርቆርዮስን አግኝተው የሚወያዩ ሲሆን፥ ሁለቱ ሲኖዶሶች እያካሂዱ ባሉት እርቀ ሰላም ላይ በቦታው በመገኘት ድጋፋቸውን እንደሚሰጡም ታውቋል።

You might also like
Comments
Loading...