Fana: At a Speed of Life!

ፓኪስታናውያን ቀጣይ መሪያቸውን ለመምረጥ ድምጽ እየሰጡ ነው

አዲስ አበባ ፣ ሃምሌ 18 ፣ 2010 (ኤፍ ቢ ሲ) ፓኪስታናውያን ቀጣይ መሪያቸውን ለመምረጥ ድምጽ እየሰጡ ነው።

የሃገሪቱን ቀጣይ መሪ የሚወስነው የሃገሪቱ ጠቅላላ ምርጫ እየተካሄደ ይገኛል።

በምርጫው ወደ 106 ሚሊየን የሚጠጉ ፓኪስታናውያን ድምጽ ለመስጠት ተመዝግበዋል ተብሏል።

በጠቅላላ ምርጫው የቀድሞው የሃገሪቱ ጠቅላይ ሚኒስትር ናዋዝ ሸሪፍ ፓርቲ የሆነው ፓኪስታን ሙስሊም ሊግ ናዋዝ ፓርቲና፥ የሃገሪቱ የክሪኬት ጀግና ኢምራን ካን ፓርቲ ፒ ቲ አይ ፓርቲ ዋነኛ ተፎካካሪዎች ናቸው።

ከዚህ ባለፈም የፓኪስታን ህዝቦች ፓርቲም የሁለቱ ፓርቲዎች ተፎካካሪ ይሆናልም ነው የተባለው።

በምርጫው አሸናፊ የሚሆነው ፓርቲ ፓኪስታንን ለመምራት በሃገሪቱ ፓርላማ አብዛኛውን መቀመጫ ማሸነፍ ይኖርበታል።

እስካሁን ባሉ ቅድመ ግምቶች የቀድሞው የክሪኬት ኮከብ ኢምራን ካን ቀጣዩ የሃገሪቱ መሪ ይሆናሉ እየተባለ ነው።

አንዳንድ መረጃዎች ደግሞ አሁን ላይ ሃገሪቱን እያስተዳደራት ያለው ወታደራዊ አገዛዝ፥ ምርጫውን ለቀድሞው ክሪኬት ኮከብ ባደላ መልኩ ለማስኬድ መንቀሳቀሱን ይገልጻሉ።

የሃገሪቱ ከፍተኛ ባለስልጣናትም ሆኑ እጩ ተፎካካሪው ካን የቀረበውን ውንጀላ አስተባብለዋል።

ሙስናን ማስወገድ፣ የሃገሪቱን ኢኮኖሚ እንዲያንሰራራ ማድረግ፣ የፓኪስታንና የአሜሪካን ግንኙነት ዳግም ማደስ እና የስራ እድል ፈጠራ የቀጣዩ ተመራጭ ፈተናዎች ይሆናሉም ነው የተባለው።

በሃገሪቱ ታሪክ ለሁለተኛ ጊዜ ሰላማዊ የስልጣን ሽግግር ይካሄድበታል በተባለው ምርጫ አሸናፊ የሚሆነው ፓርቲ እስከ ነገ ድረስ ይታወቃል።

ፓኪስታን የቀድሞ መሪዋን ካጣች በኋላ አሁን ላይ በወታደራዊ አገዛዝ ስር ትገኛለች።

የቀድሞው የሃገሪቱ ጠቅላይ ሚኒስትር ናዋዝ ሸሪፍም በሙስና ወንጀል በያዝነው ወር ማረሚያ ቤት ወርደዋል።

የእርሳቸው ፓርቲም በወንድማቸው ሸባዝ ሸሪፍ አማካኝነት እየተመራ የምርጫውን ውጤት ይጠባበቃል።

ምንጭ፦ ሬውተርስ

You might also like
Comments
Loading...