Fana: At a Speed of Life!

በኢትዮጵያና ኤርትራ መካከል የተጀመረውን የሰላም ጥረት በመደገፍ በመቐለ የድጋፍ ሰልፍ ሊካሄድ ነው

አዲስ አበባ፣ ሐምሌ 18፣ 2010 (ኤፍ.ቢ.ሲ) በኢትዮጵያና ኤርትራ መካከል የተጀመረውን የሰላም ጥረት በመደገፍ የመቐለና አካባቢው ነዋሪዎች በመጪው ቅዳሜ ህዝባዊ ሰልፍ ሊያካሂዱ መሆኑ ተገለጸ፡፡

ህዝባዊ ሰልፉ የሚካሄደው በከተማው በሚገኙ በጎ ፈቃደኛ ወጣቶች አስተባባሪነት ሲሆን ከከተማው መስተዳድርም ፈቃድ መገኘቱንና የሰልፉ አስተባባሪ ወጣት ሶፊኖስ ከበደ አስታውቋል።

የሰልፉ አላማ በሁለቱ ሀገራት መካከል የተጀመረው የሰላም ጥረት ህዝባዊ ተሳትፎ እንዲኖረው ድጋፍ ማድረግ መሆኑንም አስተባባሪው ገልጿል።

እንዲሁም የሁለቱም ሀገራት ህዝቦች በተለይም በድንበር አካባቢ ከሚኖሩት ጋር ውይይት በማድረግ የተጀመረው ሰላም ዘላቂነት እንዲኖረው መንግስታቱ ጥረት እንዲያደርጉ ማሳወቅ ሌላኛው አላማው ነው ተብሏል።

በተጨማሪም የሀገሪቱ ብሄሮችና ብሄረሰቦች በከፈሉት መስዋዕትነት የተገኘው ሰላምና ዲሞክራሲ ለማደናቀፍ እየተደረጉ ያሉ እንቅስቃሴዎች እንዲቆሙ መጠየቅ ሌላው የሰልፉ ትኩረት መሆኑም ተገልጿል።

በሀገሪቱ የህግ የበላይነትና ህገ መንግስት እንዲከበር ድምጻቸውን እንደሚያሰሙም ተጠቅሷል።

የኢትዮጵያና የክልሎች እንዲሁም የኤርትራ ሰንደቅ ዓላማዎች ለሰልፉ ድምቀት ሰጥተው እንደሚውለበለቡም ተገልጿል።

 

ምንጭ፦ኤዜአ

You might also like
Comments
Loading...