Fana: At a Speed of Life!

ግጭቶች: በተለያዩ  የሀገሪቱ ክፍሎች የሚከሰቱ ግጭቶች የህዝቡ ሳይሆኑ የፖለቲካ ነጋዴዎች ነው- ጠ/ሚኒስትር ዶ/ር አብይ

ባለፉት 27 ለተፈጠሩ ችግሮች ጠቅላይ ሚኒስትሩ በኢህአዴግ ስም ይቅርታ ጠይቀዋል

አዲስ አበባ፣ ሐምሌ 24፣ 2010 (ኤፍ.ቢ.ሲ) ጠቅላይ ሚኒስትር ዶክተር አብይ አህመድ  በሚኒሶታ  በነበራቸው  የእራት ግብዥ  ከተሳታፊዎች የተለያዩ ጥያቄዎችች ቀርበውላቸው ምላሽ ሰጥተዋል።

በዚህም በተለያዩ የሀገሪቱ ክፍሎች የሚከሰቱ ግጭቶች መነሻ ምን እንደሆኑና መንግስትም እነዚህን ግጭቶች ለመፍታት ምን እየሰራ ነው በሚል ለቀረበላቸው ጥያቄ፥ በተለያዩ የሀገሪቱ ክፍሎች የሚነሱት ግጭቶች የህብረተሰቡ እንዳልሆኑ በመግለፅ እነዚህን ግጭቶች የሚያቀጣጥሉት ሰዎች የፖለቲካ ነጋዴዎች ናቸው በማለት መልሰዋል።

ጠቅላይ ሚኒስትሩ እነዚህ የፓለቲካ ነጋዴዎች ከተግባራቸው እንዲቆጠቡ  በርካታ ስራዎች እንደተከናወኑና አሁንም ይህ ስራ  ተጠናክሮ እንደሚቀጥል ነው የገለፁት።

የኢትዮ ኤርትራ ግንኙነት ወደ ህዝብ ለህዝብ ለማውረድ ምን እንየተሰራ ነው የሚል ጥያቄም ቀርቦላቸው ነበር፥ በዚህም የኢትዮ ኤርትራ ግንኙነት ከተሻሻለ በኋላ  የተሰሩ ስራዎች  የህዝብ ለህዝብ ግንኙነቱን የሚያጠናክሩና ኢኮኖሚያዊ ግንኙነቶችን የሚያሻሽሉ መሆናቸውን ጠቁመዋል።

ጠቅላይ ሚኒስትሩ፥ ግንኙነቱ ከተሻሻለበት ጊዜ ጀምሮ የድንበርና ለግጭት ምክንያት የሆኑ ጉዳዮች እስከ አሁን ምንም አይነት ውይይት እንዳልተደረገባቸው እና  ውይይቱ ያተኮረው የህዝብ ለህዝብ ግንኙነቱን ለማጠናከር መሆኑን ተናግረዋል።

በዚህም የስልክ ግንኙነት እና የአየር ትራንስፖር አገልገሎት በሁለቱ ሀገራት መካከል እንደተጀመረ  የገለፁ ሲሆን፥ የየብስ ትራንስፖርት ለመጀመርና የኤርትራን ወደቦች ለመጠቀም ዝግጅት እየተደረገ ነው ብለዋል።

በዚህ መድረክ የጠቅላይ ሚኒስትሩ ቃላት በተለይ ፀጉረ ልውጥ የሚለውን ቃል  በማህበራዊ ሚዲያዎች ለግጭት መቀስቀሻነት እየዋሉ ነው የሚል ጥያቄም ቀርቦላቸዋል።

ፀጉረ ልውጥ የሚለው ቃል በተለያዩ አካባቢዎች ተልዕኮ በመያዝ ግጭቶችን ለመቀስቀስ የሚሞክሩ ግለሰቦች ለመግለፅ የተጠቀሙበት እንደሆነ ጠቅላይ ሚኒስትሩ አንስተዋል።

በመሆኑም ፀጉረ ልውጥ የሚለው ቃል ግለሰቦችን እንጂ ህዝብን አይወክልም በማለት ነው ያስረዱት።

በዚህ ረገድ የማህበራዊ ሚዲያዎች ላይ የተሰጠው ትርጉም የተሳሳተና ተገቢ ያልሆነ ነው ያሉት ጠቅላይ ሚኒስተሩ፥  ከእንደዚህ አይነት ድርጊቶች ሊታረሙ እንደሚገባ ነው ያሳሰቡት።

በሀገሪቱ ባለፉት 27 ዓመታት ለተመዘገቡ ስኬቶችና ችግሮች  ማን ሀላፊነቱን ይወስዳል ተብለው ጠቅላይ ሚኒስትሩ ጥያቄ ቀርቦላቸዋል።

በሰጡት ምላሽ በሀገሪቱ ለመጡት ስኬቶች ህዝብ ባለቤትነቱን ይወስዳል በማለት የገለፁ ሲሆን፥ ለተከሰቱት ችግሮች ደግሞ ኢህአዴግ ሀላፊነቱን  ይወስዳል በማለት ገልፀዋል።

በዚህ መድረክም ለተፈጠሩ ችግሮች ጠቅላይ ሚኒስትሩ በኢህአዴግ ስም ይቅርታ መጠየቀቸው ነው የተገለፀው።

በኢትዮ ሶማሌ ክልል የተለያዩ አካባቢዎች የሚታዩ ግጭቶችን፣ የመልካም አስተዳደርና የሰብዓዊ ምብት ችግሮች ለመቅረፍ ምን እንደተከናወነ በሚኒሶታ ነዋሪ የሆኑ የብሄሩ ተወላጆች ጥያቄያችን አንስተዋል።

ጠቅላይ ሚኒስትሩም የፌዴራል መንግስት በክልሉ የሚታዩትን እነዚህን ችግሮች ለማረም የተለየ ትኩረት ሰጥቶ እየሰራ ነው ብለዋል።

ፋና ብሮድካስቲንግ ኮርፖሬት ያነጋገራቸው ተሳታፊዎች ጠቅላይ ሚኒስትር ዶክተር አብይ አህመድ የሰጡት ምላሽ አርኪ እንደነበረና ብዥታዎችንም ያጠራ መሆኑን ገልፀዋል።

ጠቅላይ ሚኒስትር ዶክተር አብይ አህመድ በአሜሪካ የነበራቸው የህዝብ ውይይት ያጠናቀቁ ሲሆን ነገ ጠዋት ብፅዕ ወቅዱስ አቡነ መርቆሪዮስን ይዘው ይመለሳሉ ተብሎ ይጠበቃል።

በአብርሀም ሀይሌ

You might also like
Comments
Loading...