Fana: At a Speed of Life!

የውጭ ጉዳይ ሚኒስትር ዶ/ር ወርቅነህ ገበየሁ ከኢኳዶር አቻቸው ማሪያ ፌርናንዳ ጋር ተወያዩ

አዲስ አበባ፣ ግንቦት 21፣ 2010 (ኤፍ.ቢ.ሲ) የኢፌዲሪ የውጭ ጉዳይ ሚኒስትር ዶክተር ወርቅነህ ገበየሁ የኢኳዶር የውጭ ጉዳይ ሚኒስትር ማሪያ ፌርናንዳን በጽህፈት ቤታቸው ተቀብለው አነጋገሩ።

የውጭ ጉዳይ ሚኒስትሮቹ በነበራቸው ቆይታም በሁለቱ ሀገሮቹ መሀከል የሚኖረን ሁለገብ ግንኙነትን ለማጠናከር የፖለቲካ የምክክር አማራጭን ለመፍጠር ተስማምተዋል።

ዶክተር ወርቅነህ በዚሁ ወቅት፥ የፖለቲካ ምክክር መድረኩን አስፈላጊነት ገልፀው፤ በቴክኖሎጂ ሽግግር መስክ በጋራ ለመስራት ፍላጎት አለን ብለዋል።

ኢትዮጵያ በኢኳዶር ውክልና እንዲኖራት እንደምታደርግ ጠቅሰው፤ በአፍሪካ ቀንድ ሰላም ለማስፈን ኢትዮጵያ የምታካሂደውን ጥረት ለሚኒስትሯ አስረድተዋል።

የኢኳዶር የውጭ ጉዳይ ሚኒስትር ማሪያ ፌርናንዳን በበኩላቸው፥ የኢኳዶር ባለሃብቶች ኢትዮጵያ ውስጥ በአበባ እርሻ ልማት የተሳተፉ መሆኑን ገልፀው፤ በመስኩ በቴክኖሎጂ ልውውጥ ለመደገፍ ፍላጎታቸውን ገልፀዋል።

ኢኳዶር በአውሮፓውያኑ 2018 እና 2019 የተባበሩት መንግስታት ድርጅት ጠቅላላ ጉባኤ ፕሬዚዳንት እንድትሆን ከኢትዮጵያን ድጋፍ በማግኘቷ ማመስገናቸውን የውጭ ጉዳይ ሚኒስትር ቃል አቀባይ ጽህፈት ቤት አስታውቋል።

You might also like
Comments
Loading...